Föför 20:1-13

¹Iwe, wesin ewe fitikoko, Paulus a körifengeni ekewe chon lükü Jesus, a kapong ngeniir o eäni kapasen amwirimwir ngeniir mi apöchöküla letiper. Mürin a feil seniir o feila Masetonia.

²A saifeil lemenen ewe fanü o apöchöküla letipen ekewe aramas ren chomong an afalafal. Mürin a tori Akaia

³o a nonom ikenan lon ükükün ülüngat maram. Lupwen Paulus a amolätä an epwe sai ngeni Siria, a rongorong pwe ekewe chon Juta ra rawangauei. Iei mine a filätä an epwe liwinsefäliti lemenen ewe fanü Masetonia.

⁴Sopater nöün Pirrus seni Perea a eti, pwal Aristarkus me Sekuntus seni Tesalonika, Kaius seni Terpe, Tikikus me Trofimus seni ewe fanü Asia me Timoty.

⁵Ra akomwola mwem o witiwitikem lon Troas.

⁶Iwe, äm aia sai seni Filipi mürin ewe Chulapen mongö pilawa esap wor iis lon, nge limu rän mürin aia chufengen me ir lon Troas. Iwe, aia nonom ikenan lon ükükün eu wiik.

⁷Iwe, lekuniolun räninamol äm aia chufengen o mongöfengen ewe mongön ach Samol. Iwe, Paulus a afalafala ekewe aramas, nge a chök sopwela le afalafaleer tori lukenipwin, pun a ekiekin feil seniir sorotän ewe rän.

⁸Mi wor chomong lamp lon ewe ruum asan ia ra chufengen ie.

⁹Eman alüal itan Oitikus a mot lon eu asammwacho. Nge lupwen Paulus a sopwela chök le afalafal, Oitikus a echikichikila o möürüla tori a möürüchoula. Iwe, a turutiu lepwül me won aülüngatin sässärin ewe imw. Nge lupwen ra ekietä, a fen mäla.

¹⁰Nge Paulus a feitiu rer, a chapela won ewe alüal o romi. Iwe, a apasa, “Ousap lolilen, a chüen manau!”

¹¹Mürin a liwinsefälitä won ewe sässärin asan, a utu pilawa o ra mongöfengen me ekewe chon lükü Jesus. Iwe, Paulus a kapas ngeniir tori akkar a tötä, mürin a feil seniir.

¹²Iwe, ra emwenala ewe alüal ngeni lenian, nge a manau. Iwe, ekewe aramas ra fokun chipila.

¹³Iwe, äm aia akomwola won sip o saila tori Assos, ikenan äm aia angei Paulus me ie. Pun Paulus a ürenikem pwe aipwe föri iei usun, pokiten i a mochen fetal won fanü tori Assos.