Föför 15:3-32

³Iwe, chon ewe mwichefel ra tiniirela, nge lupwen ar saifetal lon Fönisia me Samaria, ra apworausa ngeni ekewe chon lükü Jesus usun än ekewe chon lükün Israel kul ngeni Kot. Ei pworaus a afisätä watten pwapwa lon leluken ekewe chon lükülük meinisin.

⁴Lupwen ra tori Jerusalem, chon ewe mwichefel, ekewe soukünö me ekewe souakom ra etiweer. Iwe, ra apworausa ngeniir meinisin mine Kot a föri rer.

⁵Mürin ekoch me lein ekewe chon lükü Jesus, ir chon ewe mwichen Farisi, ra ütä o apasa, “Ekewe chon lükün Israel repwe fokun sirkomsais. Oupwe pwal üreniir, pwe repwe fokun aleasochisi än Moses kewe Allük.”

⁶Iwe, ekewe soukünö me ekewe souakom ra chufengen, pwe repwe pwüngüpwüngfengen usun ei osukosuk.

⁷Mürin chomongun ar akaninifengen Petrus a ütä o üreniir, “Ämi pwii kana, oua silei pwe ekoch ier ra la Kot a filiei me leimi pwe üpwe afalafala ewe Pworausen Manau ngeni ekewe chon lükün Israel, pwe repwe tongeni rongorong o lükü Jesus.

⁸Iwe, Kot a silei ekiekin aramas meinisin, a pwärala an etiweer ren an fang ngeniir ewe Ngünmifel usun chök an fang ngenikich.

⁹Esap wor aimwümwü lefilach me ir. A amusala ar tipis, pokiten ra lükü Jesus.

¹⁰Iwe, pwota oua sotuni Kot iei ren ämi anomu won afaren ekewe chon lükü Jesus och chou ach kewe lewo pwal püsin kich mwo nge sisap tongeni uwei?

¹¹Apwi! Kich sia lükü, pwe sia küna manau ren ümöümöchün ach Samol Jesus usun chök ir.”

¹²Iwe, unusen ewe mwich a fanafanala, lupwen ra rongorong usun än Parnapas me Paulus apworausa ekewe asisil me manaman Kot a föri rer lein ekewe chon lükün Israel.

¹³Nge lupwen ar wes le kapas, James a apasa, “Ämi pwii kana, oupwe aüseling ngeniei.

¹⁴Simon a awewe ngenikich usun än Kot popuetä le pwäräta an ekiek ren an angei me lein ekewe chon lükün Israel eu mwichen aramas fän itan.

¹⁵Än ekewe soufos kapas ra fokun tipeeufengen won ei, pun a mak,

¹⁶‘Iei alon ewe Samol: Lon kan fansoun mwach üpwe liwinsefäl o aüsefälietä ewe mwün Tafit. Üpwe försefäli mine a tala o apöchökülasefäli.

¹⁷Pwe ekewe ekoch aramas meinisin repwe feito rei, ekewe chon lükün Israel meinisin, üa köri ngeniir nei.

¹⁸Iei alon ewe Samol mi asile ngeni aramas ekei mettoch me lomlom.’”

¹⁹Iwe, James a sopwela lon an kapas, “Iei ai ekiek, pwe sisap aweiresi ekewe chon lükün Israel mi kul ngeni Kot.

²⁰Nge sipwe makkei echö toropwe o asile ngeniir, pwe resap mongö och mongö mi limengau a piin asor ngeni ekewe uluulun anümwäl, resap föri sokun lisowu, resap pwal ochoch fituken man mi ffor me ün cha.

²¹Pun än Moses kewe Allük a fen alea fän chomong lon ekewe imwen felikis iteiten ränin sapat, nge an kewe kapas ra afalafala lon ekewe telinimw meinisin.”

²²Mürin ekewe soukünö me ekewe souakom fiti unusen chon ewe mwichefel ra apwüngala pwe repwe filätä ekoch mwän me leir, pwe repwe tiniirela Antiokia fiti Paulus me Parnapas. Iwe, ra filätä Silas me Jutas mi pwal iteni Parsapas, ir ruoman souemwen me lein ekewe chon lükü Jesus.

²³Iei masouen ewe toropwe ra tini ngeniir: “Äm pwimi kewe soukünö me souakom, aia tinala äm kapong ngeni ämi pwiim kana meinisin chon lükün Israel mi nom lon Antiokia, Siria me Silisia.

²⁴Äm aia rongorong pwe ekoch mwän seni leim ra torikemi, ra osukosukakemi me orukorukakemi ren mine ra apasa, nge äm aisap tiniirela remi.

²⁵Iei mine äm aia chufengen meinisin o tipeeufengen, pwe aipwe filätä ekoch mwän pwe aipwe tiniirela remi. Repwe fiti pwiich kewe mi achengicheng Parnapas me Paulus,

²⁶ir ätekewe ra fangela manauer fän iten ewe angangen ach Samol Jesus Kraist, inamwo ika ra tolong lon riaföü.

²⁷Iei mine aipwe tinala Jutas me Silas, repwe wisen apworausa ngenikemi met kewe chök kapas aia makkei lon ei toropwe.

²⁸Ewe Ngünmifel me äm aia tipeeufengen pwe aisap anomu womi och chou, pwe ekei chök allük oupwe apwönüretä:

²⁹Ousap mongö ekewe mongö ra piin asor ngeni ekewe uluulun anümwäl, ousap ün cha, ousap ochoch fituken man mi ffor, ousap föri sokun lisowu. Are oua tümwünükemi seni ekei mettoch, oupwe feiöch. Äm aia kapong ngenikemi meinisin.”

³⁰Mürin ra tinala ekewe mwän. Iwe, ra feila Antiokia. Ikenan ra amwichafengeni unusen ewe mwichen chon lükülük o ra ngeniir ewe toropwe.

³¹Nge lupwen ekewe aramas ra aleani ewe toropwe, ra uren pwapwa ren ekewe kapas mi apöchöküla leluker.

³²Jutas me Silas, ir pwal soufos, ra achomonga ar kapasen apöchöküla o anüküchara ekewe chon lükülük.