Text copied!
CopyCompare
Paipel - Föför - Föför 14

Föför 14:2-28

Help us?
Click on verse(s) to share them!
2Nge ekewe chon Juta resap lükü ra etipetipa ekewe chon lükün Israel pwe repwe ü ngeni ekewe chon lükülük.
3Iei mine Paulus me Parnapas ra nonometiu ikenan fansoun langatam. Ra pwora le afalafal usun ewe Samol, i ewe mi alletä pwe ar afalafal usun an ümöümöch a let, pun a atufichiir pwe repwe föri asisil me manaman.
4Iwe, ekewe aramas lon ekewe telinimw ra tipefesen: Ekoch ra nom won pekin ekewe chon Juta, nge ekoch ra nom won pekin ekewe soukünö.
5Mürin ekoch chon lükün Israel me chon Juta ra chufengen me nöür kewe souemwen pwe repwe ekiekifengeni usun ar repwe afeiengaua ekewe soukünö o mone ngeniir fau pwe repwe mäla.
6Nge lupwen än ekewe soukünö silei ei pworaus, ra sü ngeni ekewe telinimw Listra me Terpe lon ewe fanü Likaonia pwal ngeni ekewe fanü ünükün.
7Lon ekana leni ra sopwela le afalafala ewe Pworausen Manau.
8A wor eman mwän lon Listra a ter inisin. A mä pechen seni leuputiuan, pwe esap tongeni tufichin fetal.
9Ätei a rong än Paulus afalafal. Paulus a küna pwe a wor an lükü pwe a tongeni pöchökületä. Iei mine a newenewen ngeni
10o apasa fän leüömong, “Kopwe üwenewenetä won pecheöm!” Iwe, ewe mwän a mwetetä o popuetä le fetalfeil.
11Lupwen ewe mwichen aramas a küna mine Paulus a föri, ra kökkö fän leüömong lon fosun Likaonia, “Ekewe kot ra feitiu rech lon lapalapen aramas!”
12Ra aita ngeni Parnapas iten ar we kot Seus, nge Paulus ra aita ngeni Hermes iten pwal eman ar kewe kot, pun i ätewe mi silelap kapas.
13Iwe, nöün ewe kot Seus souasor, an imwenfel a chök nom ünükün ewe telinimw, a uwato ätemwänin kow me mwärämwär ren asamalapen ewe telinimw, pun i me ewe mwichen aramas ra mochen eäniir asor ngeni ekewe soukünö.
14Nge lupwen Parnapas me Paulus ra rong mine ra ekiekin föri, ra kamwei üfer, ra sälong lukalapen ewe mwichen aramas o kökkö fän leüömong,
15“Pwota oua föri ei sokun lapalap? Äm aramas chök usun chök ämi! Äm aia nom ikei, pwe aipwe aronga ngenikemi ewe Pworausen Manau, pwe oupwe kul seni ämi fel ngeni ekei kot mi lomotongau o fel ngeni ewe Kot mi manau, ewe mi föri läng me fanüfan me matau me meinisin mine a nom lor.
16Lon fansoun lom Kot a mwüt ngeni aramas meinisin pwe repwe püsin filätä mine ra mochen föri.
17Nge Kot a chök pwärätä usun lapalapan ren an föri ekewe mettoch mi mürina: A fang ngenikemi üt seni läng, pwal kiniemi ua lon fansoun räs, a ngenikemi enemi o aura lelukemi ren pwapwa.”
18Iei mwo ekei kapas ra eäni ngeniir, nge a weires ngeni ekewe soukünö pwe repwe pinei ewe mwichen aramas seni ar repwe asor ngeniir.
19Mürin ra war ekoch chon Juta seni Antiokia lon Pisitia pwal seni Ikonium. Ra aliapa ewe mwichen aramas ngeni ar pekin, ra monei fau ngeni Paulus o ürawu seni lon ewe telinimw, pun ra ekieki pwe a mäla.
20Nge lupwen än ekewe chon lükü Jesus ütä pwelin ünükün, Paulus a ütä o liwinsefälilong lon ewe telinimw. Iwe, sorotän ewe rän Paulus me Parnapas ra feila Terpe.
21Iwe, Paulus me Parnapas ra afalafala ewe Pworausen Manau lon Terpe o asoulängala chomong aramas. Mürin ra liwinsefäliti Listra me Ikonium o sai ngeni Antiokia lon Pisitia.
22Ra apöchöküla ekewe chon lükü o anüküchareer pwe repwe tupwöl lon ar lükülük. Ra pwal üreniir, “Sipwe tolong lon Mwün Kot ren riaföü mi chomong.”
23Iwe, Paulus me Parnapas ra filätä souakom fän iten ekewe souläng lon eu me eu kewe mwichefel. Mürin ar iotek fan echikefel ra likitiir ngeni ach Samol, ewe ir ra anomu ar apilükülük won.
24Mürin ar saifetal lon ewe fanü Pisitia, ra tori Pamfilia.
25Nge lupwen ar wes le afalafala ewe kapasen Kot lon Perka, ra feitiu lon ewe telinimw Attalia.
26Seni ikenan ra liwinsefäliti Antiokia, ewe leni ia ra anomuur ie me mwan fän tümwünün ewe ümöümöchün Kot fän iten ewe angang ra awesöchüela iei.
27Iwe, lupwen ar tori Antiokia, ra achufengeni aramasen ewe mwichefel o apworausa ngeniir meinisin mine Kot a föri ngeniir, pwal usun an suki eu asam ngeni ekewe chon lükün Israel pwe repwe lükü Jesus.
28Iwe, ra nonom ikenan ren ekewe chon lükü Jesus fansoun langatam.

Read Föför 14Föför 14
Compare Föför 14:2-28Föför 14:2-28