Föför 12:6-24

⁶Lon ewe pwinin me mwen än Herotes epwe apwüngü Petrus me mwen ekewe aramas, Petrus a möür lefilen ruoman sounfiu, a riri ngeniir ren ruofoch sein seni mächä, nge a wor chon mamas ra mamasa asamalapen ewe imwen fötek.

⁷Lon ei chök otun eman nöün ewe Samol chon läng a ü ikenan o eu saram a asarama lon ewe ruum. Iwe, ewe chon läng a pisiri won afaren Petrus, a apwökätä o üreni, “Kopwe müttir pwätä!” Lon ei chök otun ekewe sein seni mächä ra turutiu seni won pöün Petrus.

⁸Mürin ewe chon läng a üreni, “Kopwe anükü om pelit o ipweipwelong ipwom sus.” Iwe, Petrus a föri iei usun. Mürin ewe chon läng a üreni, “Kopwe üföüfolong üfom we o tapweto müri.”

⁹Iwe, Petrus a tapwela mürin o towu seni ewe imwen fötek. Nge Petrus esap silei, pwe mine ewe chon läng a föri a wesewesen fis. A ekieki pwe a wor künaan.

¹⁰Ra pwere seni ewe aeuin mwichen chon mas me ewe aruuen mwichen chon mas o ra tori ewe amüchülan asamalap seni mächä mi wene ngeni ewe telinimw. Iwe, ewe asamalap a püsin sukula ngeniir o ir me ruoman ra towu. Ra mwinemwinela won ewe al, nge lon ei chök otun ewe chon läng a feil seni Petrus.

¹¹Mürin Petrus a mefi mine a fis ngeni o a apasa, “Iei üa silei pwe mine a fis ngeniei a wesewesen let. Ewe Samol a tinato nöün we chon läng pwe epwe angasaei seni fän nemenemen Herotes, pwal seni ekewe mettoch meinisin ekewe aramasen Juta ra ekiekin föri ngeniei, pwe üpwe tolong lon riaföü.”

¹²Lupwen a wewela ren mine a fis ngeni, a feila ngeni imwen Maria, inen Johannes mi pwal iteni Markus. Ikenan chomong aramas ra chufengen o iotekfengen.

¹³Iwe, Petrus a fichifich won ewe asamalapen lükün o eman chon angang föpwül itan Rota a feiliti ewe asam pwe epwe pii iö we a fichifich.

¹⁴Nge lupwen a silleni mwelien Petrus, a fokun pwapwa, pwe a liwiniti ewe mwichen aramas, nge esap mwo suki ewe asam. Iwe, a üreniir, pwe Petrus a nom lükün ewe asam.

¹⁵Nge ir ra üreni, “Ka umwes!” Iwe, neminewe a chök änimau pwe a pwüng an kapas. Iei mine ra üra, “Iei i an chon läng.”

¹⁶Nge Petrus a chök sopwela le fichifich. Iwe, lupwen ra suki ewe asam, ra küna i o ra fokun mairü.

¹⁷Petrus a älipö ngeniir pwe repwe mosonoson o a apworausa ngeniir usun än ewe Samol emwenawu seni lon ewe imwen fötek. Mürin a üra, “Oupwe asile ngeni James me ekewe chon lükü ei pworaus.” Iwe, a feil seniir o feila lon pwal eu leni.

¹⁸Iwe, lesosorun ewe rän a fis eu watten osukosuk lefilen ekewe chon mas, pun ra aisfengen lefiler met a fis ngeni Petrus.

¹⁹Mürin än Herotes küttafichi Petrus, nge esap küna, a atittinafichi ekewe chon mas o a allük pwe repwe ninnila. Mürin ei, Herotes a feila seni Jutea o feila Seserea o a nonom ikenan eu fansoun.

²⁰Iwe, Herotes a fokun song ngeni ekewe chon Tirus me Siton. Iei mine ekoch me leir ra tipeeufengen o feila pwe repwe churi Herotes. Ra akomwen aliapa Plastus, eman nöün ewe king nöüwis mi wisen nemelapei imwan, pwe epwe nom lon pekiir. Mürin ra feila ren Herotes o tüngor an epwe kinamwe ngeniir, pun ir me aramasen fanüer ra angei aner mongö seni fanüen ewe king.

²¹Lon eu rän mi kefilitä, Herotes a üföüfolong üfan üfen king, a mot won an lenien motun king o afalafal ngeni ekewe aramas.

²²Iwe, ekewe aramas ra kökkö fän leüömong, “Sap mwelien eman aramas, nge i mwelien eman kot!”

²³Lon ewe chök otun nöün ewe Samol chon läng a ni Herotes, pun esap ngeni Kot lingan. Iwe, moso ra äni fitukan pwe a mäla.

²⁴Nge ewe kapasen Kot a chök chöfetal ekis meinisin o lalapala.