Esayi 10:8-27

⁸Amasɔtɔ e naxa, ‘N ma sofa kuntigine mi findixi mangane xan na ba?

⁹N mi Kalano taan suxi alo Karakemisi taan ba? N mi Xamata taan ligaxi alo Arapada taan ba? N mi Samari taan ligaxi alo Damasi taan ba?

¹⁰N bata suxure batu yamanani itoe suxu, naxanye suxurene yi fisa Yerusalɛn nun Samari yamanan gbeene xa.

¹¹N naxan liga Samari yamanan nun a suxurene ra, n mi nɔɛ na ligɛ Yerusalɛn nun a suxurene ra ba?’ ”

¹²Koni Marigin na yelin a wanle birin nakamalɛ Siyon geyaan fari e nun Yerusalɛn yi, a Asiriya mangan fan saranma nɛn a yɛtɛ yiteen nun a yɛɛ rawason na.

¹³Amasɔtɔ na mangan yi a falama nɛn, a naxa, “N feni itoe birin ligaxi n fangan nun n ma fe kolonna nin, amasɔtɔ xaxilimaan nan n na. N bata yamanane danne kala, n yi e nafunle muɲa, n mangane ba e dɔxɔdene yi alo sɛnbɛmaan yɛtɛna.

¹⁴N bata siyane nafunle tongo alo muxun xɔli tɛɛn tongon kii naxan yi. N bata bɔxɔ xɔnna seene birin malan alo muxun xɔli xɛlɛ rabeɲinxine matongon kii naxan yi. E sese mi nɔxi e gabutɛni tɛ, hanma e dɛ xanli bi, e wuga.”

¹⁵Bunbin nɔɛ a yɛtɛ matɔxɛ dangu a rawali muxun na ba? Sɛrana a yɛtɛ matɔxɛ dangu a rawali muxun na ba? Bosaan nɔɛ a tongo muxun nawalɛ ba? Dunganna nɔɛ muxun tongɛ ba?

¹⁶Nanara, Marigina Alatala Sɛnbɛn Birin Kanna yama hiyabuxini ito radoyenma nɛn. Halagi ti tɛɛ gbeen yi so e binyen na.

¹⁷Isirayilaa kɛnɛnna, Ala yɛtɛɛn findima nɛn tɛɛn na. E sariɲantɔɔn yi findi tɛɛ dɛgɛn na, a Asiriya yamanan ɲanle nun a sɛxɛne birin gan, e ɲan lɔxɔ kedenni.

¹⁸A fɔtɔn gbeene raxɔrima nɛn fefe e nun wudin naxanye birin bogima. A yamanan halagi alo furemaan nɛma doyenɲɛ.

¹⁹Wudi dɔnxɛn naxanye na lu Asiriya fɔtɔnne yi hali dii ɲɔrɛna, a nɔɛ e yatɛn sɛbɛ nɛn.

²⁰Na lɔxɔni, Isirayila yamaan muxu dɔnxɛn naxanye na lu e nii ra Yaxuba bɔnsɔnni, ne mi fa e lannantenyaan sama e ɲaxankata muxune yi sɔnɔn. E fa e lannayaan sama Alatala nin, Isirayilaa Ala Sariɲanxina.

²¹Yamaan muxu dɔnxɛne xɛtɛma nɛn Ala sɛnbɛmaan ma, Yaxuba bɔnsɔnna muxu dɔnxɛne.

²²Anu, Isirayila kaane, hali ɛ yamaan wuya ayi alo mɛɲɛnsinna naxan fɔxɔ igen dɛ, hali na, e dɔnxɛdin nan tun xɛtɛma. Halagin bata ragidi, naxan gboma ayi, a mɔn tinxin.

²³Marigina Alatala Sɛnbɛn Birin Kanna bata halagin naxan nagidi, a na rakamalima nɛn yamanan birin yi.

²⁴Nanara, Marigina Alatala Sɛnbɛn Birin Kanna ito nan falaxi, a naxa, “N ma yamana, ɛ tan naxanye dɔxi Siyon yi, ɛ nama gaxu Asiriya kaane yɛɛ ra! E ɛ bɔnbɔma nɛn dunganna ra, e yi gbengbetenni te ɛ xili ma alo Misiran kaane yi a ligama kii naxan yi nun.

²⁵Koni benun waxati, n ma xɔlɔn ɲanma nɛn ɛ xili ma. N fitinaxin yi keli e kaladeni.”

²⁶Alatala Sɛnbɛn Birin Kanna bosaan tongoma nɛn Asiriya kaane xili ma, alo a keli Midiyan kaane xili ma kii naxan yi Orebi fanye yireni. A a dunganni bandunma nɛn baan xun ma, alo a liga Misiran yamanani kii naxan yi.

²⁷Na lɔxɔni, a goronna bama nɛn ɛ tungunna ma, e goron tongo wudin naxan sa ɛ kɔɛ ma konyiyani, ɛ xungboma nɛn han na yi gira, a bira.