Esayi 10:20-34

²⁰Na lɔxɔni, Isirayila yamaan muxu dɔnxɛn naxanye na lu e nii ra Yaxuba bɔnsɔnni, ne mi fa e lannantenyaan sama e ɲaxankata muxune yi sɔnɔn. E fa e lannayaan sama Alatala nin, Isirayilaa Ala Sariɲanxina.

²¹Yamaan muxu dɔnxɛne xɛtɛma nɛn Ala sɛnbɛmaan ma, Yaxuba bɔnsɔnna muxu dɔnxɛne.

²²Anu, Isirayila kaane, hali ɛ yamaan wuya ayi alo mɛɲɛnsinna naxan fɔxɔ igen dɛ, hali na, e dɔnxɛdin nan tun xɛtɛma. Halagin bata ragidi, naxan gboma ayi, a mɔn tinxin.

²³Marigina Alatala Sɛnbɛn Birin Kanna bata halagin naxan nagidi, a na rakamalima nɛn yamanan birin yi.

²⁴Nanara, Marigina Alatala Sɛnbɛn Birin Kanna ito nan falaxi, a naxa, “N ma yamana, ɛ tan naxanye dɔxi Siyon yi, ɛ nama gaxu Asiriya kaane yɛɛ ra! E ɛ bɔnbɔma nɛn dunganna ra, e yi gbengbetenni te ɛ xili ma alo Misiran kaane yi a ligama kii naxan yi nun.

²⁵Koni benun waxati, n ma xɔlɔn ɲanma nɛn ɛ xili ma. N fitinaxin yi keli e kaladeni.”

²⁶Alatala Sɛnbɛn Birin Kanna bosaan tongoma nɛn Asiriya kaane xili ma, alo a keli Midiyan kaane xili ma kii naxan yi Orebi fanye yireni. A a dunganni bandunma nɛn baan xun ma, alo a liga Misiran yamanani kii naxan yi.

²⁷Na lɔxɔni, a goronna bama nɛn ɛ tungunna ma, e goron tongo wudin naxan sa ɛ kɔɛ ma konyiyani, ɛ xungboma nɛn han na yi gira, a bira.

²⁸E bata Ayati taan li. E danguma Migiron nin, e yi e goronne lu Mikimasi taani.

²⁹E danguma geya longori ra kiraan nan xɔn e a fala, e naxa, “En xi Geba yi.” Rama kaane xuruxurunma gaxuni. Sɔli a taan Gibeya muxune bata e gi.

³⁰Galin kaane, ɛ gbelegbele! Layisa kaane, ɛ tuli mati! Anatɔti kaane, ɛ makininkinin de!

³¹Madimena kaane bata xuya ayi, Gebimi kaane e luxunden fenma.

³²To, yaxune sa tima nɛn Nobi yi, e yi e yiini te, e yi e kɔnkɔ Siyon taa faɲin geyaan xili ma, Yerusalɛn geyana.

³³Marigina Alatala Sɛnbɛn Birin Kanna wudi yii gbeene sɛgɛma nɛn sɛnbɛni. Wudi kuyene yi rabira bɔxɔni. Naxanye kondeye mate han, a ne ragodoma nɛn.

³⁴A fɔtɔnna ɲansanne sɛgɛma nɛn bunbin na, Liban fɔtɔnne yi bira Sɛnbɛ Kanna bun.