Esayi 10:10-30

¹⁰Maa duma réew yu seeni yàllantu, seeni tuur sut tuuri Yerusalem ak Samari.

¹¹Na ma tege loxo Samari aki yàllantoom, duma ni tege loxo Yerusalem aki tuuram?»

¹²Boroom bi nee: «Bu ma sottalee liggéey fa kaw tundu Siyoŋ ak fa Yerusalem, maay mbugale buurub Asiri réy-réyloom gi, ak gëti xeebaateem.»

¹³Moom moo ne: «Sama dooley përëg laa defe lii, maa xelu, ràññee; ba randal kemi suufi xeet yi, foqati seeni alal, dañ boroom jal ya niw yëkk, wàcce leen.

¹⁴Maa teg alali xeet yi loxo, ni ku gis am tàgg. Maa tonneendoo réewi àddina ni ku for ay nen, tonni lépp, laaf tëf-tëfluwul, sàll newul ciib!»

¹⁵Sémmiñ dina diir mbagg ka koy gore? Am dogukaay dina réy-réylu ba sut ka koy doge? Mbete yet wuy xàcci ka ko ŋàbb; mbaa bolde bu walbatiku ŋàbb boroom!

¹⁶Moo tax Boroom bi, Aji Sax ji Boroom gàngoori xare yi, di yebal woppi ràgg fi kaw mbuxreem yi, seen daraja tàkk, sawara xoyom ko.

¹⁷Aji Sax ji, leeru Israyil mooy doon sawara, ku Sellam kooku mooy doon tàkk-tàkku sawara, xoyom taxasi Asiri aki dégam ci benn bés.

¹⁸Gott bu naat ak tool bu meññ, mu ne faraas fóom, ba mu mel ni ku wopp, yaram way seey,

¹⁹gott ba dese garab yu néew yu gone mana lim, bind ko.

²⁰Keroog bés booba li des fi Israyil ak li rëcce kër Yanqóoba duñu wéerooti ña leen duma. Aji Sax ji lañuy wóolu, wéeroo ko, Aji Sell ju Israyil.

²¹Aw ndes ay délsi, di ndesu askanu Yanqóoba, ñeel Yàlla Jàmbaar ji.

²²Seen xeet wi ni feppi suufas géej lay tollu, te as ndes a ciy délsi. Àtteb sànkute mooy taxaw, yoon toppe ba mat sëkk.

²³Sànkute déy mooy taxaw, Boroom bi, Aji Sax ji Boroom gàngoor yi di ko sottal fi réew mi mépp.

²⁴Moo tax Boroom bi, Aji Sax ji Boroom gàngoor yi dafa wax ne: «Yeen sama ñoñ ñi dëkke Siyoŋ, buleen ragal waa Asiri yi leen di dóor yet, ŋàbbal leen bolde ni waa Misra daa def ak yeen.

²⁵Waaye fi leek lu néewa néew mbugal jeex fi seen biir, am sànj sippil Asiri seen sànkute.»

²⁶Aji Sax ji Boroom gàngoor yee leen di ŋàbbal kàccri, na mu defoon waa Majan fa doju Oreb. Mooy xàcciw yetam, mu dal géej, na mu defoon fa Misra.

²⁷Bésub keroog sëf bu ñu leen sëfoon wàcc leen, ngeen tàggook yet wu ñu leen tënke woon, nde seen yaram ay naat, ba yet wa damm.

²⁸Noon yeey songsi Ayat, jéggi Migron, dem ba Migmas, teg fa seeni jumtukaay,

²⁹jaare ca xunti ma te naan: «Geba lanuy fanaani!» Waa Raama tiit, waa Gibeya gu Sóol daw.

³⁰Yeen waa Galim, yuuxuleen, yeen waa Laysa, dégluleen, yeen waa Anatot, feeluleen.