ESAII 1:6-20

⁶kɛ́túótɛ́ di nɑɑ̀cɛ̀i kɛ́ntɔ kɛ́tuɔkɛnɛ̀ di yɔ dɛ̀mɑrɛ̀ tɛ̃́nkɛ í feí, yɛkɔutiyɛ̀ nɛ̀ yɛmuɔ nɛ̀ yɛmɑ̀ɑ̀tɛ̀ dɛɛ̀ di dɑ́ɑ́tí, òmɔù í yɛ̀ ɔu, òmɔù í yɛ̀ bou, òmɔù mɛ nyí yɛ̀ wɑ́ɑ̀rì mɛkùɔ̀.

⁷Di kó kɛtenkɛ̀ dɔúnkomu, kɛ̀ muhɑ̃ɑ̃́ ncùɔ́ di ɛkɛ̀, kɛ̀ di bo kɛ̀ bɛpɔ̀ɔ̀bɛ̀ tɑnní di tenkɛ̀ kɛ cɑɑri di kpɛrɛ Kɛ cɑ̀kɛ dihɛì bɛ̀ do cɑ̀kɛ mɛ̀ɛ̀ botí bɛtɔbɛ̀ tenkɛ̀.

⁸Siyɔ̃ɔ̃ ɛì kɔbɛ bɛɛ̀ mɑ́ɑ̀ nɛ́ yentɛ́, kɛ kpɑɑ́ kupɑɑkɔ̃tɛ́touku ɔ̃ ndòmmɛ̀ fínyĩ̀ kó dɛtie mmiɛkɛ, difii ɔ̃ nsokɛ́mɛ̀ tipétì miɛkɛ kɛ do ndihɛì bɛ̀ pi dì.

⁹Kɛ̀ ti Yiɛ̀ nKuyie Mpɑkɛdɑɑ do í coo nti kó bɛ̀mɑbɛ̀, nɛ̀ yíe nti kpɛrɛ do dèèmu kɛ nɑɑ́nnɛ̀ Sodɔmmu ɛì kɔbɛ kpɛrɛ, kɛ sɑ̃̀ɑ̃́tɛ́nɛ̀ Komɔɔ ɛì kɔbɛ kpɛrɛ.

¹⁰Kɛ̀ ti Yiɛ̀ nKuyie mbɛ́i nkɛ dɔ̀: Kéntɛ́nɛ̀ díndi Sedisɑdɛmmu ɛì kó bɛkpɑ̀ɑ̀tìbɛ̀, di cɑ̀kɛmu kɛ dònnɛ̀ Sodɔmmu ɛì kɔbɛ, kéntɛ́nɛ̀ kɛ́keè mí nKuyie n tié. Di sĩ̀ntɛmu Komɔɔ ɛì kɔbɛ do dòmmɛ̀.

¹¹Iwũɔ̃ di n feu ì pɛ́u pɛ́u, n kpɛti í ì bonɛ̀. M pɛ̃̀mmu yɛpedɑkɛ di n kɔù yɛ̀ kɛ tùɔ̀ nɛ̀ yɛnɑɑdɑpɑ̀ɑ̀ nkó mɛkùɔ̀. N yí dɔ́ yɛnɑɑdɑkɛ̀ nɛ̀ yɛpedɑpɑ̀ɑ̀ nɛ̀ yɛbɔdɑkɛ̀ dɛ kó mɛyĩ̀ĩ̀.

¹²Di ɔ̃ɔ̃ kɔtɛní m borɛ̀ nɛ̀ ìì wũɔ̃ kɛ̀ ì nsĩnkùnko n dɑ̀nkù, míì dɛ̀ ndi bekɑɑ̀?

¹³Yóunɛ̀ di bo nni mpɑ̃ɑ̃mmɛ̀ yɛpɑ̃rɛ̀ dɛtetìrɛ̀ kpɛyɛ, di n cɔ́unko tìì úúntì n dò nyisɔkɛ nyi, yóunɛ̀ otɑ̃̀nkù pɑ̀nwè kó dibɑnni nɛ̀ tɛom̀pùtɛ̀, nɛ̀ yɛbɑɑ nsɔnyɛ di bɑɑ̀ nyɛ̀ n kpɛ́í yɛbɑɑ nyɛ̀ɛ̀ kɔkɛ́nɛ̀ mɛyɛi, n dɛ̀ pɛ̃̀mmu n yí dɛ̀ dɔ́,

¹⁴Di bɑɑ̀ mbɛtɑ̃ɑ̃̀pɑ̀mbɛ̀ kó yɛbɑɑ nyɛ̀ nɛ̀ mɛtíímmɛ̀ di ɑ̃ɑ̃̀mɛ̀ n kpɛ́í dɛ̀ n dò nyisíɛ́ nyi dɛ̀ tu ditɔu ndi n kpɛ́í, n dɛ̀ ɔ̀unɛ̀mu.

¹⁵Di ɔ̃ nkɛ̀ di yòùtɛní di nɔu m bíɛ́kɛ̀ kɛ m bɑ́ɑ́ nní mbúútóomu kɛ̀ di m bɑ́ɑ́ nkɛ m bɑ́ɑ́, m bɑ́ nkémmú di nɔu siì mùɔ̀ti mɛnitiyĩ̀ĩ̀.

¹⁶Ɔ́únɛ̀ dimɑ́ɑ̀ kɛ́wenkɛ, yóunɛ̀ di dɔɔri mɛ̀ɛ̀ yɛi n yììkɛ̀ Yóunɛ̀ dɛ̀ɛ̀ í wenni mudɔɔ̀rìmù.

¹⁷Ketɛ́nɛ̀ mɛsɑ̀ɑ̀ mmudɔɔ̀rìmù, ndɔɔrinɛ̀ dɛ̀ɛ̀ sìɛ́, kɛ́nkommu bɛ̀ fɛ̃́ũnko bɛ̀, kɛ́mpĩ́ mmɛsɑ̀ɑ̀ nyiciribí, kɛ́nkommu bɛkúpobɛ̀.

¹⁸Kɛ̀ ti Yiɛ̀ nKuyie mbɛ́i nkɛ dɔ̀: Kɔtɛnɛ̀ní kɛ̀ ti yɑ̀ di kpɛti bɑ́ kɛ̀ di yɛi nwũɔ̃tɛ́ kɛ dò mmɛyĩ̀ĩ̀ di bo wenkɛ tɛwɑ̃̀tɛ̀ dòmmɛ̀ kɛ̀ mɛ̀ dɔ́ mɛ̀ ndò nfɛtònfɛ̀ di bo pɛikɛ tipedɑpɑ̃́ɑ̃́tì kɔ̃mɛ.

¹⁹Kɛ̀ di tɑ̃ɑ̃tɛ́ kɛ yíé n kpɛti, di yóó dimu dihɛì kpɛrɛ dɛ̀ɛ̀ tu dɛsɑ̀ɑ̀rɛ̀.

²⁰Kɛ̀ di mɛ nyetɛ kɛ kpénkùnnɛ di to, disiè diì yóó di kònnɛ̀. Mí ndi Yiɛ̀ nKuyie mmíì bɛ́i ndɛ kó dinùù.