Erubasa 8:2-23

²Edhithitindeg sikandin diyà te metikang he menge lugar ziyà te kilid te zalan, diyà te menge suyuk,

³wey ziyà te menge ǥemawan te inged, wey ziyà te menge veyeey. Ne ebpengumew sikandin te,

⁴“Sikiyu is langun he menge etew, edlelaǥan ku sikiyu.

⁵Sikiyu is menge wazè din utew hanew, penigudu kew wey kew mebmetau. Sikiyu is menge tulebung, gemita niw is kedsavut niw.

⁶Pemineg kew su zekelà is pulus wey hustu heini is egkeǥiyen ku.

⁷Egkaǥi a te tutuu, su egkeepesan ku is kegkaǥi te mezaat.

⁸Tutuu is langun he egkeǥiyen ku; wazà tarù wey limbung he menge lalag ku.

⁹Is etew he zuen din kedsavut, ne utew zin egkekeleduwi is langun he menge lalag ku, ne wazà igkesawey zin duen.

¹⁰Ne isipa niw he lavew pa he mahal is penurù ku kenà te pelata, ne isipa niw zaan he lavew pa he mahal is ketau kenà te pinilì he vulawan.

¹¹Su is ketau mahal pa kenà is mahalen he menge vatu, ne wazà minsan hengkey he egkesuatan te etew he ebpekerepeng kayi.

¹²Siak, is ketau, metau he ed-isip-isip ke hendei is hustu etawa kenà, wey netuenan ku ke ebmenmenuwen te ed-angken is ketau wey kedsavut.

¹³Is langun he edtahud te Nengazen, igkeepes dan is mezaat. Egkeepesan ku is kegkegelbuwen, is kegkemepelevawen, is mezaat he menge vetasan, wey is winalì he menge lalag.

¹⁴Metau a he edsambag, duen ku hustu he ketau. Duen ku meupiya he kedsavut wey ǥehem.

¹⁵Pinaaǥi kediey ebpekezumala is menge hadì, wey edhimu is menge pengulu te metazeng he menge kesuǥuan.

¹⁶Ne pinaaǥi zaan kediey ebpekezumala is langun he metazeng he ebpemendumala wey menge upisyal.

¹⁷Ebmahalen ku is mibmahal kediey, ne is ebpen-ahà kediey egketuredu e zin.

¹⁸Ebpekeveǥey a te ketiǥeyunan, dengeg, keuswaǥan wey kezeeǥan he kenà egkahanew.

¹⁹Is keupiyaanan he egkekuwa te etew he nekaangken kedì, mahal pa kenà is kuruna he vulawan etawa pelata.

²⁰Edsunuzen ku is metazeng wey is hustu.

²¹Is mibmahal kediey ebeǥayan ku te ketiǥeyunan; ebpenuen ku is teleǥuey zan te ketiǥeyunan.

²²Puun pa te puunà, daan e en dutun te wazè pa limbaǥa te Nengazen is langun.

²³Impelastar e zin en puun pa te puunà. Daan e en dutun te wazè pa is kelibutan: is daǥat, is menge serebseb, is menge vuntud, is menge vuvungan, is menge vevesukà, wey minsan pa is menge eliyavuk.