Erubasa 7:1-10

¹Mama, layun nu tumana is menge lalag ku ne kenè nu lipati is menge suǥù ku.

²Tumana nu is menge suǥù ku ne edluǥeyazan ka te untung. Ne pekeventayi nu is menge penurù ku iring te ked-urami nu te mata nu.

³Ipemula nu heini ziyà te isip nu wey nu kenà melipati.

⁴Is ketau, isipa nu he iring te etevey nu, ne is kedsavut, isipa nu he iring te utew nu emiǥu.

⁵Tenged kayi egkelikayan nu is bahi he edsalàsalà te esawa zin, wey te mekevivihag he menge lalag dan.

⁶Diyà te valey ku zuen timpu he midsulew a,

⁷ne neehè ku is menge vetan-en he menge maama he wazè dan pa utew pereg, ne nesusi ku he is sevaha kandan egketalengtaleng.

⁸Midhipanew sikandin pehendiyà te suyuk he zutun kes ed-ubpaan te sevaha he vahi he mengungumpadi.

⁹Mahapun en dutun ne malù en ebmerusirem.

¹⁰Ne midsinuǥung sikandin te vahi he mibivisti te iring te visti te vahi he ebelegyà te zengeg din, ne zuen din mezaat he pelanu.