Erubasa 6:1-13

¹Mama, emun nenangdù ka he iyan ka ebayad te utang te sengeeetew wey mibpesarig ka he iyan ka ebpenavak te televaken te zuma,

²ne egkezeetan ka zutun te penangdù nu,

³ne zuen nu en televaken diyà te zuma. Piru iyan heini ul-ulaha nu su wey ka melibri zutun te penangdù nu ziyà te kandin: Hendiyè ka te kandin ne hangyù ka he tevangi ke zin he mekelingkawas ka zutun te televaken nu.

⁴Kenè ka lipezeng wey himeley taman te ebpekelingkawas ka.

⁵Libriya nu is keugelingen nu iring te selazeng etawa tagbis he nekaawà he nelitaǥan te mengenganup.

⁶Sikiyu is menge peǥulen, ahaa niw wey istudyuwi niw ke mibmenumenu te menge lemetik is kedlaǥud te igkeuyag dan, para mehimu kew he uluwanen.

⁷Minsan wazè dan egalen etawa pengulu he ebmandar kandan,

⁸iyan, edtiǥum sikandan te egkekaan dan timpu te ǥulavung wey tiraǥun su para zuen dan mekaan emun tipenguzan.

⁹Sikiyu is menge peǥulen, edtulung kew zè be edliplipezeng? Keenu kew en be ed-enew?

¹⁰Hidhizeǥè kew, liplipezeng kew, pahareyharey kew,

¹¹ne egketik-ew egkehitavù diyà te keniyu is kewewezai he iring te kebpekeuma te neǥumeenan he tulisan.

¹²Is menge etew he wazè dan pulus wey is mezaat is menge ulaula zan, ne iyan dà idsuǥuksuǥuk dan is ebpemenudtul te tarù.

¹³Ebpemengendat sikandan wey ebpeuy-uyawà pinaaǥi te menge velad wey paa zan para te kedlimbung te zuma.