Erubasa 4:6-23

⁶Kenè nu iselikwey is ketau, kekenà, mahala nu heini su iyan heini ebantey wey ed-elima kenikew.

⁷Is ketau etawa is kedsavut iyan utew impurtanti he kinahanglan te etew, umbe penigudu ka wey nu maangken heini minsan maamin pa is langun he azen nu.

⁸Mahala nu utew wey tipiǥi nu is ketau, ne pinaaǥi kayi egkevantug ka.

⁹Iring heini te kuruna he menge vulak he ebpekeveǥey kenikew te kekempet wey zengeg.”

¹⁰Mama, pemineǥa nu wey tumana nu is menge egkeǥiyen ku su wey ka luǥeyazi te untung.

¹¹Mibpenurù ku en sikew ke ebmenmenuwen is kebpengungubpaan he egkezumahan te ketau wey kebpurungpurung.

¹²Emun edtumanen nu heini, wazà egkehimu he velavag te kebpengungubpaan nu, wey wazà mezaat he egkehitavù kenikew.

¹³Pekezeseni nu te egawed is penurù ku; kenè nu ituǥut he maawà diyà te kenikew, pekeventayi nu su iyan heini untung nu.

¹⁴Kenè nu iringi is menge vaal te menge lalung.

¹⁵Likayi nu heini ne pedeyuna nu is metazeng he kebpengungubpaan.

¹⁶Su kenè dan ebpekelipezeng emun kenè dan pa ebpekevaal te mezaat etawa ebpekependelahig te zuma.

¹⁷Is mezaat he menge ulaula wey is kebpesipala, impeiring dan te keenen wey inumen.

¹⁸Is kebpengungubpaan te menge etew he metazeng ne igkepetug-iring te aney en he kedsilà te andew ke egkepawà he ebmerayag taman te meudtu.

¹⁹Ne is kebpengungubpaan mulà te menge etew he mezaat is menge ulaula zan, igkepetug-iring te utew merusirem, ne kenè dan egketuenan ke hengkey is hinungdan te kegkezeeti kandan.

²⁰Mama, purungi nu pemineǥa is menge penurù ku kenikew.

²¹Tentenuzi nu heini, ne tipiǥi nu heini ziyà te ǥehinawa nu.

²²Su ebpekeveǥey heini te meupiya he kedlelawa wey meluǥayad he untung te edawat kayi.

²³Purungi nu pekeventayi is diyà te isip nu, su ke hengkey is ed-is-isipen nu, iyan daan egkeveelan nu.