Erubasa 31:5-26

⁵Su emun egkelangut sikandan, ne kela ke melipati zan is menge kesuǥuan, ne ed-ewaan dan te ketenged is menge pubri.

⁶Iyan ereg he ebpelelangut is etew he egkeewaan en te perateng, wey mesakit is gehinawa zan.

⁷Ereg sikandan he ed-inum te vinu su wey zan melipati is kewewezai zan ne wey zan kenà metenuzi is menge elentusen dan.

⁸Levani nu is ebpekevenar he mekehizuhizu he etew, he kenà metau he ebpengetezengan he iyan ebpekeuǥup kandin.

⁹Emun egkukum ka ne ipeikul nu te hustu he kukuman, ne levani nu is ketenged te menge pubri.

¹⁰Is buutan he esawa mahal pa kenà is menge rubi, iyan, utew mereǥen he ebpen-ahaan.

¹¹Is maama he buutan is esawa zin, utew zekelà is kedsarig din dutun te esawa zin, ne kenà sikandin egkeǥansi.

¹²Is buutan he vahi ne taman en te kebpatey zin, ne kenà sikandin ed-ula-ula te minsan hengkey he ebpekezezaat te esawa zin.

¹³Meǥied sikandin he ebpemaal te manggad he welin wey linu.

¹⁴Igkepetug-iring sikandin te varku te menge nigusyanti; ne ed-uwit sikandin te keuyaǥan minsan te meziyù is ebpuunan din he menge inged.

¹⁵Merusirem pa ne ed-enew en sikandin is ed-andam te egkekaan para te pemilya zin, wey egkeǥiyan din is menge suluǥuen din he menge vahi ke hengkey is ebeelan dan.

¹⁶Metau sikandin he ebpilì te tanà, ne ebpemesahan din heini. Ebpepemulaan din heini te paras he ebpemesahan din te selapì he netiǥum din.

¹⁷Meviserviser sikandin wey utew mesigudu he edterebahu.

¹⁸Metau sikandin he ebpetiǥayun, ne mesigudu sikandin he edterebahu su taman en te ebmerusirem.

¹⁹Iyan en sikandin ebpenhavel te ebeelan he kumbalà.

²⁰Igkeǥaǥew zin is menge pubri wey ebpenginahanglan.

²¹Emun timpu te meǥenew, ne kenè din igkeseeng haazà su zuen mekepal he manggad para te pemilya zin.

²²Ebpengavel sikandin te para te idempas diyà te hizeǥaan. Ne ebivisti sikandin te mekempet wey mahalen.

²³Diyà te inged dan, ne telehuzen is esawa zin wey sevaha te menge edlingahaan dutun.

²⁴Haazà is bahi ebpenahì te mekempet he menge visti su manggad he linu, wey ebpemaal zaan sikandin te vakes ne haazà pudu zin ibpemelegyà diyà te menge tumitinda.

²⁵Melig-en sikandin wey edtehuzen, ne kenè din igkehandek is egkehitavù te huziyan he menge andew.

²⁶Emun egkaǥi sikandin ne egketuusan ta he uluwanen sikandin, ne meelima sikandin he ebpenurù.