Erubasa 2:3-18

³Peniguduwi nu he mekaangken ka te kedsavut,

⁴iring te kebpeniguduwi nu kebpen-ahaa te selapì etawa nekeeles he ketiǥeyunan.

⁵Ne emun egkeveelan nu heini, egkesavut nu is kehuluǥan te kedtehuza te Nengazen, wey egkesavut nu is ketau mehitenged kandin.

⁶Su is Nengazen iyan ebeǥey te ketau. Ne iyan daan sikandin ebpuunan te keuluwanen wey kedsavut.

⁷Egkelesaǥan din wey edteǥenahan din te kezeeǥan is menge metazeng is menge ulaula,

⁸su wey sikandan is menge metazeng wey menge metinumanen, ne egkepengelangan din sikandan dutun te menge ebeelan dan.

⁹Emun ebpemineg ka kedì, egketuenan nu ke hengkey is meupiya he ed-ul-ulahan: is hustu, metazeng, wey mezait he menge ulaula.

¹⁰Ne egkehimu ka he uluwanen, ne ebpekeveǥey heini kenikew te kelipey.

¹¹Egkehimu he kutè nu is hustu he kedsavut nu,

¹²ne iyan ebpekepelikey kenikew te mezaat he ebeelan wey te menge etew he egkaǥi te sayep.

¹³Heini he menge etew mid-awà diyà te metazeng he kebpengungubpaan, ne iyan mid-ikul zan is menge ulaula pehendiyà te merusirem.

¹⁴Igkelipey zan is kebaal te mezaat, ne igkelangan dan is kelelalung he ebeelan dan.

¹⁵Mezaat is ulaula zan; ne midsuwey zan puun te hustu he zalan.

¹⁶Pinaaǥi te ketau, ebpekelikey ka wey ka kenà metintal emun edtintalen ka te vahi he edsalàsalà pinaaǥi te menge lalag he ebpeketintal.

¹⁷Haazà he vahi nekidsuwey te esawa zin hein betan-en pa sikandin; wazè din en isipa is meupiya he menge penangdù din diyà te Megbevayà.

¹⁸Benar iyan, emun edhendiyè ka te valey zin ne iring te iyan nu ebeyaan is kemetayen nu. Ne is ked-ikul nu te zalan pehendiyà te valey zin, ne iring te iyan nu ed-ikulen is dalan pehendiyà te iveyaan.