Erubasa 28:4-28

⁴Is etew he kenà edtuman te Kesuǥuan, igkesuat din is kelelalung, iyan, is etew he edtuman kayi, igkeepes din mulà is kelelalung.

⁵Is menge etew he lalung kenè dan egkesavut is hustu he kukuman, piru is menge etew he edangep te Nengazen egkepurung dan mulà egkesavut is hustu.

⁶Deyzey pa is pubri he wazà duen igkesawey kenà is sepian he kenà hustu is menge ulaula zin.

⁷Is anak he edtuman te Kesuǥuan ne uluwanen, piru is anak he ebpekid-elukuy te wazè din pulus he etew, ne egkepeel-elezan din is amey zin.

⁸Is etew he ibpeuswag din is ketiǥeyunan din pinaaǥi te utew subra he kebpepursintu, is ketiǥeyunan he egketiǥum din, egkehimu he egkaangken te etew he igkeǥaǥew zin mulà is menge pubri.

⁹Is minsan hentei he kenà edtuman te Kesuǥuan, egkeepesan te Megbevayà minsan is menge pengemuyù din.

¹⁰Is etew he edhimuwen din is paaǥi wey mekeulaula te mezaat is etew he metandang, ne egkeuney sikandin te mezaat he vaal zin. Iyan, is etew he wazà duen igkesawey ed-uswag mulà.

¹¹Is menge etew he sepian, ed-isipen dan he uluwanen en sikandan, piru is pubri he etew he zuen din kedsavut, egketuenan din ke hengkey he kelasi he etew is sepian.

¹²Emun metazeng is egkehimu he zekelà is keǥehem din, ne henduen be te ibayew is menge etew tenged te kegkelipey zan, iyan, emun lalung is egkehimu he zekelà is keǥehem din ne edliyasen is menge etew.

¹³Is etew he id-eles din is menge salè din ne kenà ed-uswag, iyan, is etew he idtug-an din wey ed-engkezan din te ed-ulaula is menge salè din, igkehizu sikandin te Megbevayà.

¹⁴Utew zeyzey is etew he layun din edtehuza is Nengazen, iyan, is etew he kenà ebpezumazuma, ne ziyà sikandin ebpekepevayà te kezeetan.

¹⁵Iring te edhiniǥer he erimaung wey ebpemendurus he bir is lalung he etew he edumala te menge pubri.

¹⁶Is pengulu he mesipala te menge sakup din iyan kes pengulu he kenà metau. Piru is pengulu he kenà egkesuat he edsepian te kenà meupiya he paaǥi ne edluǥeyazan te untung.

¹⁷Is etew he edsemuken te isip din tenged te kebpekevaal zin te mezaat pinaaǥi te kebpemumunù din, wazè din kelinew taman te kebpatey zin. Ne kenà sikandin ipetevangi te minsan hentei.

¹⁸Is etew he wazè duen igkesawey ne kenà egkekeizan, piru is etew he kenà hustu is ulaula zin ne meǥaan egkahanew.

¹⁹Is mevasuk ne ed-uzaren, iyan, is peǥulen mulà ne egkeey-eyuwan.

²⁰Is etew he egkeseriǥan ne edtuvazan te Megbevayà; iyan, is etew he egègaanen din is kegketiǥayun din te zekelà, ne iyan egkepengkusan din is kegkesiluti kandin.

²¹Kenà meupiya emun duen edepiǥan nu. Piru zuen duma he menge etew he mibaal kayi tenged te midsipsipan sikandan, minsan deisey zà heini.

²²Is etew he legezen, eggègaanen din is kedsepian din, iyan, wazè din metueni he iyan edtaǥad kandin is kewewezai.

²³Igkesuat pa te etew emun edewayen nu sikandin su wey mepenurù, kenà ke edigdiǥen nu sikandin.

²⁴Is etew he edtuu he kenà sayep emun iyan din dà ebpenekawan is amey zin wey iney zin, ne iring sikandin te tulisan.

²⁵Is etew he leǥezen ebpeketuvù te kesevaan, iyan, is etew he edsarig te Nengazen ed-uswag mulà sikandin.

²⁶Is etew he edsarig te keugelingen din ne tulebung. Is etew he ebpenigudu para med-uluwanen ne kenà egkemenu.

²⁷Is etew he edtelewizen din is pubri kenà egkeeminan te minsan hengkey he kinahanglan din, iyan, is etew he kenè din en ebeliyen is menge pubri ebpenrewakan sikandin.

²⁸Emun lalung is egkehimu he edumala edliyasen is menge etew. Piru emun ebpematey haazà is menge lalung, ne iyan en maan edumala is menge metazeng.