Erubasa 23:7-33

⁷Su is etew he iring keniyan, ebelensiyen din is kezekelà te egkekaan nu. Ke sikandin, “Pengaan ka.” Piru kenè bes ebpuun diyà te meupiya he ǥehinawa zin is kegkekeǥiya zin dutun.

⁸Umbe, kenè ka penigudu kaan su egkeutè nu is nekaan nu ne egkaawè is pulus te kedeliǥa nu kandin.

⁹Kenè ka mebpekidlalag te menge tulebung, su minsan metau ke pa he ed-lalag wazà pulus gihapun kayi ziyà te kandan.

¹⁰Kenè nu eǥawa is tanà te menge ilu pinaaǥi te kedhelina te menge kezaan he menge simintu kayi.

¹¹Su is Nengazen iyan mekeǥeǥehem he edlavan kandan. Iyan sikandin ebpengalang kandan kuntra kenikew.

¹²Pemineg ka emun ebpenuruen ka su wey ka mebmetau.

¹³Kenè ka mebpeneǥana he ebmansu te anak nu. Su is kedlegkuta nu kandin ne kenè din ibpatey,

¹⁴kekenà, iyan idluǥeyazi kandin te untung.

¹⁵Mama, melipayen a emun uluwanen ka,

¹⁶wey hustu is menge lalag nu.

¹⁷Kinahanglan he kenè ka egkesina te menge mekesesalà, kekenà, tehuza nu layun is Nengazen.

¹⁸Su emun edtehuzen nu sikandin, tutuu iyan he zuen meupiya he egkeperateng nu; kenà egkehimu he wazà pulus te menge tinguhè nu.

¹⁹Mama, pemineǥa nu is egkeǥiyen ku. Penigudu ka wey ka mehimu he uluwanen ne isipa nu is hustu he ed-ul-ulahan.

²⁰Kenè ka mebpekiduma te menge lelenguten wey vuleǥuk,

²¹su heeyan he kelasi te menge etew ne melemu he egkepubri. Edtulung dan dà ebpenlipezeng, umbe iyan egketemanan dan is ebpekekukumbalè dan dà te tuǥak.

²²Pemineǥa nu is ginikanan nu he iyan mid-uyag kenikew ne kenè nu iyan dà ivaras kandan is bà nu zà edsudia emun ebmeǥurang dan en.

²³Peniguduwi nu he maangken nu is ketutuanan, ketau, kegkemansu, wey kedsavut. Ne kenè nu heini iliwà te minsan hengkey he menge azen.

²⁴Utew igkelipey te ǥinikanan nu emun metazeng ka wey uluwanen ka,

²⁵lavi en is iney nu.

²⁶Mama, pemineǥa nu purungi is egkeǥiyen ku, ne sunuza nu is menge ulaula ku.

²⁷Is bahi he ebelegyà te zengeg din, ne ebpekezezaat kenikew. Iring heini te mezalem he vitu wey meliǥet he vudsi.

²⁸Iring sikandin te tulisan he edtaǥad te egkebiktima zin, ne iyan sikandin hinungdan te kedlseselai te menge maama te menge esawa zan.

²⁹Hentei is mekehizuhizu he etew, peretebek, riklemedur, melemu he egkengepelian, wey layun dà meriǥà is mata zin? Iyan heini sikan is etew he lelenguten, he egkesuat layun he egezam te nekedselekawà he inumen.

³¹Kenè ka petintal te keriǥa wey ked-ilak-ilak te vinu ziyà te seled te vasu wey is ketaam kayi he ed-inumen.

³²Su emun egkelangut ke en, ne selakew en is egkeǥezam nu te lawa nu, iring te edhereg he uled he egkaǥat kenikew.

³³Ne minsan hendei ke zà meketengteng, ne kenà meupiya is ked-isip-isip nu.