Erubasa 22:2-17

²Is sepian wey pubri pudu midlimbag te Nengazen.

³Is etew he uluwanen, egketuenan din te edlikey emun duen kemereǥenan he ebpekesuǥat kandin, iyan, is etew he wazè din utew emet ne kenà ed-eliǥu zutun, umbe ebpekebmereǥen sikandin.

⁴Pinaaǥi te kenà kebpelavew te etew wey te kedtehuza zin te Nengazen, egkehimu he egkaangken din is dekelà he ketiǥeyunan, meupiya he zengeg, wey keluǥayad te untung.

⁵Is ibayà te lalung he menge etew, ne iring te zalan he zuǥiyen wey zuen duen menge litag. Is etew he ebpekeziyù keniyan he zalan ne ed-empingan din is untung din.

⁶Kinahanglan he ibansey ta ziyà te menge vatà is menge ulaula, he zait he ed-ul-ulahan, ne emun ebmeǥurang en sikandan, ne kenè dan edsuwey zutun.

⁷Is menge egkengaayuayu ne egkeveyveyaan te menge sepian, ne is menge ebpengutang uripen te menge neutangan dan.

⁸Is ebpemula te kelelalung ebpekeraǥun te kezeetan, ne kenè en ebpekependezaat te zuma.

⁹Edtuvazan te Nengazen is etew he kelelaǥan, su edtelewizen din is menge pubri.

¹⁰Emun ibpaawà diyà te inged is menge etew he sumpalit, egkaawà daan is kebpelewlewanà, kesevaan, wey is kebpein-insultuwà.

¹¹Is etew he lumpiyu is gehinawa zin wey menayù is kebpengaǥikaǥi zin ne egkehimu he emiǥu te hadì.

¹²Ebpurungan ebentayi te Nengazen is menge uluwanen, piru edezeetan din is menge pelanu te menge teruen.

¹³Mezakel is menge pesangil te tepulan. Kenè kun sikandin egawas su zuen kun erimaung diyà te ǥawas he edawi kandin.

¹⁴Is kegkaǥikaǥi te vahi he lebag ne ebpeketintal, iring te mezalem he vudsi, ne heini he vudsi ne egkeulug kayi is egkeepesan te Nengazen.

¹⁵Kineiya te vatà is kelelalung, piru egkaawà heeyan diyà te kandin pinaaǥi te kebmensuwa kandin.

¹⁶Egkepubri is etew he edèdaaǥen din is egkeey-eyuwan su wey meumani is ketiǥeyunan din etawa iyan din ebegayan is sepian.

¹⁷Heini is menge lalag te uluwanen he menge etew. Pemineǥa nu heini purungi zutun te kebpenurua ku kayi kenikew,