Erubasa 22:13-29

¹³Mezakel is menge pesangil te tepulan. Kenè kun sikandin egawas su zuen kun erimaung diyà te ǥawas he edawi kandin.

¹⁴Is kegkaǥikaǥi te vahi he lebag ne ebpeketintal, iring te mezalem he vudsi, ne heini he vudsi ne egkeulug kayi is egkeepesan te Nengazen.

¹⁵Kineiya te vatà is kelelalung, piru egkaawà heeyan diyà te kandin pinaaǥi te kebmensuwa kandin.

¹⁶Egkepubri is etew he edèdaaǥen din is egkeey-eyuwan su wey meumani is ketiǥeyunan din etawa iyan din ebegayan is sepian.

¹⁷Heini is menge lalag te uluwanen he menge etew. Pemineǥa nu heini purungi zutun te kebpenurua ku kayi kenikew,

¹⁸su ebpekeveǥey heini kenikew te kelipey emun kenè nu heini egkelipatan.

¹⁹Ibpenurù ku heini kenikew ǥuntaan su wey nu iyan meseriǥi is Nengazen.

²⁰Insurat ku is 30 he menge erubasa he ebpekeveǥey te ketau wey menge selembaǥan.

²¹Pinaaǥi kayi egketuenan nu ke hengkey is hustu, ne ebpekeveǥey ka te egkeseriǥan he menge tavak diyà te menge etew he ed-insà kenikew.

²²Kenè ka pemintahà te menge pubri, wey kenè nu sikandan pegpeǥesa ziyà te hukmanan,

²³su is Nengazen iyan edlavan kandan. Emun hengkey is ebeelan niw ziyà te kandan he kenà meupiya ne iyan daan ebeelan te Nengazen diyà te keniyu.

²⁴Kenè ka mebpekid-emiǥu te etew he melemu egkepauk,

²⁵su kela ke mekeiring ka kandin, ne egke-uwit-uwit ka zutun he kineiya.

²⁶Kenè ka mebpesarig he iyan ka ebayad te utang te zuma.

²⁷Su emun kenè ka ebpekevayad, egkuwaan dan is hizeǥaan nu.

²⁸Kenè nu ihalin is taltal te tanè nu, he iyan kes taltal he intaltal te menge apù nu.

²⁹Is etew he metau he ebaal te edterebehuwen din ebpekepenilbi te hadì ne kenè diyà te menge etew zà duen.