Erubasa 19:2-20

²Kenà meupiya emun tekew ki en egkeleglegetayi te wazè ta metueni is ked-ul-ula zuen wey is egkehimu he rimeǥas din. Kenà meupiya is kedegdeǥusu su kela ke mesayep ki.

³Duen menge etew he edezeeten dan is keugelingen dan tenged te kedtinulebung dan, ne iyan ebesulan dan is Nengazen.

⁴Tenged te kesepian te etew egkehimu he mahabet is menge emiǥu zin, ne tenged daan te kegkeey-eyuwi te etew, ed-engkezan sikandin te menge emiǥu zin.

⁵Edsilutan is teruen he tistiǥus, ne kenà ebpekeǥawas te silut is minsan hentei he edtarùtarù.

⁶Mahabet is edhimu te paaǥi wey zin mepenunuat is etew he lavew is pid-etawan din, ne emun duen etew he ebpekeveǥey te menge keupiyaanan ne mahabet is egkaǥi he emiǥu zin haazà is nekeveǥey te menge keupiyaanan.

⁷Is etew he pubri, kenà idtetepian te menge kezuzumahi zin, iyan pe be medseǥipà kandin is menge emiǥu zin dà. Emun ebpetavang ka kandan ne ed-eles dan.

⁸Is kebpenigudu te etew su wey mehimu he uluwanen, ne tuus he igkeseeng din is keugelingen din, ne heini he etew ed-uswag.

⁹Edsilutan is teruen he tistiǥus, ne is minsan hentei he ebpengaǥi te tarù ne egkezeetan.

¹⁰Kenà dait is tulebung he etew he ebpengungubpaan he zekelà is ketiǥeyunan din, ne tuwas pa he kenà dait is uripen he ebayàbayà te menge edumala.

¹¹Tenged te ketau te etew, egkehimu sikandin he mepelevayen. Ne igkelipey zin is kebpesaylu zin te nekesalà diyà te kandin.

¹²Emun egkepauk is hadì ne iring haazà te edhiniǥer he erimaung, iyan, is tavang din igkepetug-iring daan te zehemug he ebpekepetuvù te pinemula.

¹³Is tulebung he anak, ebpekezezaat te amey zin, ne is bahi he peretebek te esawa zin, ne iring te edtiǥisan he atep.

¹⁴Is baley wey zuma pa he menge azen, egkepengevilin diyà te ginikanan, iyan, Nengazen mulà is ebpekeveǥey te uluwanen he esawa.

¹⁵Emun ebpepepeǥul ka wey edtulung ke zà edlipezeng ne siguradu ebitilen ka.

¹⁶Is kebpezumazuma te etew te menge suǥù te Megbevayà, iyan egkehimu he ibmeluǥayad te ked-ubpè din, piru is kenà edtuman ne meǥaan dà egkeumuri.

¹⁷Emun ebeǥey ki ziyà te menge pubri, ne iring te impesambey nu is Nengazen, su iyan is Nengazen ebayad kenikew.

¹⁸Mensuwa nu is menge anak nu zutun te zuen pa timpu. Emun kenè nu sikandan ebmensuwen, iring te mid-uǥup ka he edhimatey kandan.

¹⁹Beleǥaza nu is etew he uuringeren te ked-etuvang te neveelan din, su emun ed-uǥupan nu sikandin, ne egkelayam ne edsublien din is mibeelan din.

²⁰Pemineǥa nu is idsambag kenikew ne zewata nu is ibpenurù kenikew ne emun egkeuǥet egkehimu ka he uluwanen.