Erubasa 15:1-28

¹Is menayù he kedtavak, ebpekepevehew te pauk, iyan, is hangger he kedtavak, ebpekepeiseg te pauk.

²Emun egkezineg te menge etew is menge lalag te uluwanen, egkesuat dan he mebmetau, piru is edlelaǥen te menge tulebung pudu zà tinulebung.

³Egkaahà te Nengazen is minsan hendei. Egkeehè din is ed-ul-ulahan te minsan hentei, metazeng etawa lalung.

⁴Is lalag he menayù, ebpekepayùpayù te gehinawa, iyan, is menge lalag he ebpekelimbung, ebpekaawà te kezasig.

⁵Is taleng he etew ne kenè din ebpezumdumahan is penurù te amey zin, piru is uluwanen mulà, ebpemineg te ibpenurù kandin.

⁶Duen dekelà he ketiǥeyunan te menge metazeng diyà te valey zan. Ne is egketiǥeyunan te menge lalung, ebpekeveǥey kandan te samuk.

⁷Edseysayen te menge uluwanen is ketau; kenà heini egkeveelan te menge tulebung.

⁸Egkeepesan te Nengazen is pemuhat te menge lalung, piru igkesuat din mulà is menge kebpengemuyù te menge metazeng.

⁹Egkeepesan te Nengazen is etew he ed-ulaula te mezaat, piru ebmahalen din mulà is ebpeninguhà he mekeulaula te metazeng.

¹⁰Utew merasey is ibmansu te etew he ed-engked he ed-ulaula te meupiya, ne is kenà ebpezawey, iyan egkepengkusan din is kemetayen.

¹¹Kenà ebpekeeles diyà te Nengazen is egketagu diyà te isip wey ǥehinawa te minsan hentei su minsan is egkengeulaula ziyà te iveyaan, ne netuenan din.

¹²Is etew he sumpalit, kenà egkesuat he ebpenuruen ne kenà sikandin ebpekisambag diyà te metau.

¹³Emun duen kelipey ziyà te ǥehinawa te etew ne ebpekeǥemen sikandin, iyan, emun mesakit is gehinawa zin ebmerembunut is kebuvuked din.

¹⁴Is etew he pereudseb, ebpenigudu wey meumani is netuenan din, iyan, is tulebung, kenè en mulà ebpeninguhà he mebmetau sikandin.

¹⁵Is menge pubri layun edlised, piru emun egkekuntintu zan ne layun dan egkelipey.

¹⁶Deyzey pa is etew he zeisey zà is ketiǥeyunan din, iyan, edtahud sikandin te Nengazen kenà is etew he zekelà is ketiǥeyunan din, iyan, layun egkesemuki.

¹⁷Deyzey pa is menge etew he lumbey zà is sezè dan, iyan, egiǥineǥawè dan, kenà is menge etew he usa is sezè dan, iyan, ebpekunkuntedehè dan.

¹⁸Is etew he melemu egkepauk, egkehimu he hinungdan te kesevaan, iyan, is etew he mepelevayen, ebpekehusey te egkesavà.

¹⁹Layun edlised is etew he tepulan, iyan, is etew he metandang is ulaula zin, kenà mulà edlised.

²⁰Is anak he metau, igkelipey te amey zin, iyan, is anak he tulebung, edsaweyen din is iney zin.

²¹Is etew he kenà meudseb, igkelipey zin is ketutulebungi zin, iyan, is etew he meudseb, layun hustu is ed-ul-ulahan din.

²²Egkehimu he kenè ta egkekuwa is ebpelenuwan ta te egkuwa emun wazà ebpekesambag kenita te meupiya he paaǥi, iyan, emun mahabet is ebpekesambag kenita ne egkekuwa ta.

²³Igkelipey te etew emun egkeisip din is hustu he kegkeǥiya te egkeǥiyen din, lavew en ke egkekaǥi zin haazà diyà te hustu he timpu te kegkeǥiya zuen.

²⁴Is etew he metau, iyan ed-ikulen din is dalan pehendiyà te untung ne kenà iyan is dalan pehendiyà te kemetayen.

²⁵Edrundusen te Nengazen is baley te etew he mepelevawen, iyan, edtipiǥan din mulà is menge azen te valu.

²⁶Igkeepes te Nengazen is ked-isip-isip te lalung, piru igkesuat din mulà is ked-isip-isip te metazeng he etew.

²⁷Is etew he leǥezen, egkesemukan is pemilya zin tenged kandin, ne is etew he kenà ebpesipsip, edluǥeyazan te umur.

²⁸Is etew he metazeng, edtimtimbangen din edhuna a ziyà te isip din ke hengkey is idtavak din, iyan, iburaswang mulà te etew he lalung is mezaat he menge lalag.