Erubasa 13:6-24

⁶Is meupiya he menge ulaula, iyan bantey te menge metazeng, piru is mezaat he menge ulaula, iyan ebpuew te menge mekesesalà.

⁷Duen etew he uvag kun sepian sikandin, iyan, wazè din ketiǥeyunan. Ne zuen daan uvag kun pubri, iyan, dekelà is ketiǥeyunan din.

⁸Is sepian egkevelukasan din is untung din, iyan, wazà edhulgà te etew he egkeey-eyuwan.

⁹Is kerayag te menge metazeng ebpurung edsiǥa, iyan, is sulù te ebpemen-ulaula te mezaat ne egkeevukan mulà.

¹⁰Samuk dà is egketuvù pinaaǥi te kebpelavew. Ne is etew he metau, ebpesambag sikandin.

¹¹Is selapì he melemu is paaǥi te kegkekuwaa zuen, meǥaan dà egkahanew, iyan, ed-uswag mulà is selapì he mereǥen is paaǥi te kegkekuwaa zuen.

¹²Is kenà kegkeengkena te etew te penganduy zin ne ebpekezezaat te ǥehinawa zin, piru is etew he naangken din is penganduy zin ne ebpekelig-en wey ebpekelipey kandin.

¹³Is etew he kenà ebpezumazuma te ibpenurù, iyan edsuǥù kandin he merasey, piru is etew he ebpezumazuma te suǥù, ebpekehendiyà mulà te keupiyaanan.

¹⁴Is ibpenurù te etew he uluwanen, iring te kedtudà te wahig he ebpekeveǥey te untung, su pinaaǥi zutun, egkesenggilahan ta is ebpekepemevavà te umur ta.

¹⁵Edtehuzen is etew he meupiya is ked-isip-isip din. Piru is etew he kenà edtuman te hustu, ne iring sikandin te ed-ikul ziyà te zalan he vetuwen.

¹⁶Is etew he metau he ed-isip-isip ke hendei is hustu etawa kenà, ed-is-isipen din dèpa, ne human din ebeeli heini, piru is lalung mulà kenè din en ed-is-isipen, umbe ibpeehè din iyan is kelelalung din.

¹⁷Is menunudtulà he kenà egkeseriǥan ebpekeveǥey te rirù, iyan, is menunudtulà he egkeseriǥan ebpekeveǥey mulà te kelinew.

¹⁸Is etew he kenà egkesuat he ebpenuruen, iyan egkepengkusan din is egkepeey-eyuwan wey egkepeel-elezan, iyan, egkezeliǥan mulà is etew he ebpekeventayan din is idawey kandin.

¹⁹Utew ta igkelipey emun egkekuwa ta is utew ta egkesuati, iyan, kenà mulà egkesuat he ed-iniyug te mezaat is menge tulebung.

²⁰Is etew he uluwanen layun ebpekiduma te iring din he uluwanen, iyan, ebpekebmereǥen mulà is etew he layun ebpekiduma te tulebung.

²¹Ebpekeuma is ebpekezezaat te mekesesalà, piru is menge metazeng ne ebelesan te meupiya.

²²Is ketiǥeyunan te etew he metazeng ne egkepengevilin te menge apù din, iyan, is azen te mekesesalà, iyan ebpekaangken duen is menge metazeng.

²³Dekelà pezem he keuyaǥan is egkekuwa ziyà te tanà te egkengeey-eyuwan, piru kenè dan egkepulusan heini tenged te kenà metazeng is ebeelan te zuma.

²⁴Wazè nu pelenggaa is anak nu emun kenè nu ebmensuwen, wazè nu heini pelenggaa. Emun pelanggè nu sikandin, edtulizen nu is mezaat he betasan din.