Erubasa 13:2-14

²Is etew he meupiya is kebpengaǥikaǥi zin, ne meupiya is ibales kandin, piru is etew he meluiven ne edezeetan.

³Is etew he ebenteyanan din is kebpengaǥikaǥi zin, ne iring te iyan din ebentayan is keugelingen din, piru sikan is kenè din ebenteyanan is kebpengaǥikaǥi zin, edezeetan din is keugelingen din.

⁴Emun peǥulen is sevaha he etew, duen pezem egkesuatan din, ne kenè din egkekuwa heini, piru emun meǥied sikandin, egkekuwa zin is subra pa te egkesuatan din.

⁵Is etew he metazeng, igkeepes din is kedtarùtarù, iyan, is etew he mezaat is menge ulaula zin, mekeeled-eled mulà is menge lalag din.

⁶Is meupiya he menge ulaula, iyan bantey te menge metazeng, piru is mezaat he menge ulaula, iyan ebpuew te menge mekesesalà.

⁷Duen etew he uvag kun sepian sikandin, iyan, wazè din ketiǥeyunan. Ne zuen daan uvag kun pubri, iyan, dekelà is ketiǥeyunan din.

⁸Is sepian egkevelukasan din is untung din, iyan, wazà edhulgà te etew he egkeey-eyuwan.

⁹Is kerayag te menge metazeng ebpurung edsiǥa, iyan, is sulù te ebpemen-ulaula te mezaat ne egkeevukan mulà.

¹⁰Samuk dà is egketuvù pinaaǥi te kebpelavew. Ne is etew he metau, ebpesambag sikandin.

¹¹Is selapì he melemu is paaǥi te kegkekuwaa zuen, meǥaan dà egkahanew, iyan, ed-uswag mulà is selapì he mereǥen is paaǥi te kegkekuwaa zuen.

¹²Is kenà kegkeengkena te etew te penganduy zin ne ebpekezezaat te ǥehinawa zin, piru is etew he naangken din is penganduy zin ne ebpekelig-en wey ebpekelipey kandin.

¹³Is etew he kenà ebpezumazuma te ibpenurù, iyan edsuǥù kandin he merasey, piru is etew he ebpezumazuma te suǥù, ebpekehendiyà mulà te keupiyaanan.

¹⁴Is ibpenurù te etew he uluwanen, iring te kedtudà te wahig he ebpekeveǥey te untung, su pinaaǥi zutun, egkesenggilahan ta is ebpekepemevavà te umur ta.