Erubasa 12:9-21

⁹Deyzey pa is etew he ed-isipen din he minus is pid-etawan din, he ebpekeveǥey te suhul te suluǥuen din, kenà te etew he ed-isipen din he lavew is pid-etawan din, piru edlised su wazè din egkekaan.

¹⁰Is metazeng he etew, ed-elimahan din is menge uyaǥen din, piru is ketulanged te etew he mezaat is menge ulaula zin, ebpekezezaat su seligkep dà.

¹¹Is mevasuk, ne layun dekelà is keuyaǥan din, piru sikan is etew he kenà utew metau he ed-isip ke hengkey is hustu, kenè din egkenuǥunan is timpu he egkeusik.

¹²Is etew he lalung, iyan din layun egkesuati is kebaal te mezaat, umbe kenà melig-en is kebpekesavuk din, piru is metazeng mulà, melig-en iring te kayu he mezalem is nesenevan te menge zalid din.

¹³Is mezaat he kegkaǥikaǥi te mezaat he etew iyan ebpuunan te samuk, iyan, is metazeng he etew ebpekelikey mulà te samuk.

¹⁴Is meupiya he menge lalag wey meupiya he menge ulaula, ne meupiya zaan is rimeǥas din.

¹⁵Is etew he tulebung, kenà ebpemineg te sambag su kunaan din ke hustu en is paaǥi zin, iyan, ebpemineg mulà te sambag is etew he uluwanen.

¹⁶Is tulebung he etew, emun ed-insultuwan segugunà egkepauk, iyan, is etew he uluwanen kenè din edseǥipaan is ked-insultuwi kandin.

¹⁷Is kenà teruen he tistiǥus, hustu is ebpengeǥiyen din diyà te hukmanan, iyan, is tarù he tistiǥus, tarù is kandin he ebpengeǥiyen.

¹⁸Is kenà binentayan he kegkaǥi, iring te lembitan su ebpekepalì te ǥehinawa, iyan, is menge lalag he mibpurungan is-isipa ne ebpekevey te keupiyaanan.

¹⁹Is menge lalag he tutuu kenà egkaawà te wazà pidtemanan, iyan, is lalag he tarù meǥaan dà egkahanew.

²⁰Limbung is egketaǥù diyà te ǥehinawa te etew he iyan ed-isipen din is kebaal te mezaat, iyan, kelipey mulà is egketaǥù diyà te ǥehinawa te etew he ebpen-ahà te melinew he kebpekesavuk.

²¹Wazà ebpekekaid te etew he metazeng, iyan, samuk mulà is egkeperateng te menge etew he mezaat is menge ulaula zan.