Erubasa 10:6-24

⁶Edtuvazan te Megbevayà is metazeng he etew, iyan, is menge lalag te lalung he etew ebpekezezaat.

⁷Is metazeng he etew, egkehimu sikandin he tuvad te zuma ne layun sikandin egketenuzi, piru is lalung he etew egkelipatan en.

⁸Is uluwanen he etew, ebpezumdumahan din is menge suǥù, iyan, is etew he sumalè en is ebpengeǥiyen din, ne kezeetan is egkepengkusan din.

⁹Is etew he metazeng meziyù te kezeetan, piru is etew he ebaal te mezaat egketuenan is salè din.

¹⁰Is etew he limbungan ebpekeveǥey te samuk, ne is etew he sumalè en is ebpengeǥiyen din egkezeetan.

¹¹Is menge lalag te etew he metazeng ebpekeveǥey te keupiyaanan diyà te zuma, piru is menge lalag te lalung he etew ebpekezezaat.

¹²Is kegkeepes ebpeketuvù te kesamuk, piru is etew he zuen din kebmahal ne ebpekepesaylu te langun he menge sayep.

¹³Duen menge meupiya he penurù he egkekuwa ta ziyà te menge lalag te etew he metau, iyan, is engey ereg he ebmensuwen etawa edsilutan.

¹⁴Is menge uluwanen ebpenigudu pa wey meumani is ketau zan, piru is menge tulebung edtulung egkaǥi te ebpekezezaat kandan te kenà egkeuǥet.

¹⁵Is menge sepian iyan kutè dan is ketiǥeyunan dan, ne is menge ayu-ayu, iyan ebpekezezaat kandan is kewewezai.

¹⁶Is suhul te etew he metazeng iyan is meupiya wey meluǥayad he untung, piru silut mulà is egkeraǥun te lalung he etew.

¹⁷Is etew he ebpezumazuma te menge penurù, ebpekaangken te meupiya wey meluǥayad he untung, piru is etew he kenà ebpemineg te menge penurù egketazin.

¹⁸Teruen is etew he id-eles din is kegkepauk din, ne tulebung is etew he pereituk.

¹⁹Is etew he verak melemu ebpekesalà. Piru is uluwanen he etew egketuenan din te ked-eǥen is dilè din.

²⁰Is menge lalag te metazeng he etew mahal iring te pelata, piru is isip te lalung he etew wazè din pulus.

²¹Is lalag te metazeng he etew ebpekeveǥey te keupiyaanan diyà te mezakel he menge etew, piru is menge tulebung ebpemematey tenged te kekurang te kedsavut dan.

²²Ebpekepesepian te etew is kedtuvazi kandin te Nengazen, ne kenà heini egkekuwa pinaaǥi te subra he kebpenigudu.

²³Is igkelipey te tulebung iyan is kebaal te mezaat, piru is igkelipey te etew he zuen din kedsavut iyan is kebpengungubpaan duma is ketau.

²⁴Iring te is igkeherati te etew he mezaat is menge ulaula zin, ne egkelaus egkehitavù diyà te kandin, is etew he metazeng, egkekuwa zin is edtinguhaan din.