Eklisiatis 3:1-16

¹Oyae luabu go su-amaa opeare nipuna opape yapidina opea.

²Gote-me niaa onaa go su-amaa madiape di gua wala omape di page gea. Eta wai poape yapidi page gua eta naape awape yapidi page gea.

³Gote-me onaa yaina maetape page aa tumaope yapidi page luabu nipumi saaya. Nipumi oyae maoyaatua wala maepeape yapidi page nipumi ama pea.

⁴Nipumi re lape yapi di page giri lape yapidi page nipumi ama saaya. Odo omape di page yasa pawa lape di page saaya.

⁵Nipumi onaa rapu patape yapidi page saaya rekena sua gimape yapidi page saaya. Ona ripinape page ona naorape yapidi page saaya.

⁶Oyaenu alupae asapape yapidi page oyae alupape yapidi page saaya. Oyae waru amagepu sape di page saya oyaenu yolo rubape di page saaya.

⁷Laplap marae riripia wala rabulape di page saaya. Agaa lorape yapidi page agaa lape di page saaya.

⁸Di mo robaa kalape ao para di mo ratu yawape ao saaya. Yada pape page gimape yapidi page saaya.

⁹Kalaipu kogono peme aanu nimuna meape epe yaere ake meme pae?

¹⁰Gote-me niaa repara epenata kedaare neme aba ade.

¹¹Gote-me oyae luabu ora epe rupa openata. Nipumi niana kone marekaawa oyae raayo page abia opea yae abade opesa yaenu luabu makua adamonalo kone gea. Goyapare Gote nipuna pea luaburi abade page abia page niaame na-adape-rupa pisa.

¹²Neme go mada kone padane sua epe redepota adoa pe. Go epeta konere gupa. Niaame go su-amaa pima raburi kone padane sua pedo waru pua piramina.

¹³Eta ipa nalima raburi raana rapu awa namina. Goa palimadare Gote nipumi pa ode gi yae meda madaa rana ora waru omoa namina.

¹⁴Gote nipuna peanu senisi napea-daa neme waru makuaayo. Dia go piane aure oroyalo pa su-aalia. Gote nipumi pulalo peare aa medame makibumawa mada napalia. Gote nipuna pea rayore medame na-alopalimi. Gote-me go pisare onaa luabu nipuna rolo-para pirinalo pisa.

¹⁵Abia go peayaenuri abade page opesa. Yaenu orope paliade-nu page abade pesa yaenu. Gote-me abade pisa yaenu diana kone naia. Dia go yaenu wala opena kone ia.

¹⁶Neme ade rabu go su-amaa yae meda gupa iya. Onaame epe kone epe pora ratua apere gimeme. Dia nimumi wae pora ora rateme.