Eklezyas 1:1-6

¹Men pawòl pitit David la, filozòf la, ki te wa nan lavil Jerizalèm.

²Nan lavi a anyen pa vo anyen. Se sa filozòf la di. Non, anyen pa vo anyen nan lavi a. Tout bagay gen pou pase.

³Yon moun te mèt pase tout lavi l' ap travay di, ap bay kò l' traka sou latè beni, kisa sa rapòte l'?

⁴Moun fèt, moun mouri. Men sa pa deranje anyen sou latè.

⁵Solèy leve, solèy kouche. L'ap kouri tounen kote pou l' leve a ankò.

⁶Van an soufle soti nan nò desann nan sid. Apre sa, li vire soti nan sid moute nan nò. Konsa, l'ap vire tounen nan menm chemen an san rete.