Eklesiastes 10:2-19

²Karogon ni be’ nib gonop e ma rin’ ban’en ni bfel’ ma be’ nib balyang e ma rin’ ban’en nib kireb.

³Farad pinat e ba gagyel ni mus ngak e milekag ni yad ra mada’ u kanawo’ mra nang; yad ma pag gubin e girdi’ nge nang ni yad bbalyang.

⁴Fa’anra damumuw e en nib ga’ rom ngom, ma dab mu pi’ babyorem ni ngam tal ko maruwel; ma tin ni rib kireb ni ka mu rin’ e rayag ni ngan pithgem riy ni fa’anra mu th’ab gulngam.

⁵Irera’ ban’en nde mat’aw ni ku gguy uroy u fayleng — ban’en nde mat’aw e pi tagagiyeg e yad tapgin.

⁶Girdi’ nib pinat e ni pi’ e liw ngorad nib tolang mab ga’ lungun min fek owchey ko pi’in ba yo’or ban’en rorad.

⁷Kug guy e sib ni be yan u os ma be yan e pilung u but’ ni bod e sib.

⁸Fa’an ga ra ker e low, ma ga ra mul nga langgin; ma fa’an ga ra bilig e rungrung nga barba’, mra k’adem e porchoyog.

⁹Fa’anra ga be maruwel u lan e gin yima ker e malang riy ma ga ra maad’ad ko malang. Fa’anra ga be sey e l’ud ma ga ra maad’ad riy.

¹⁰Fa’anra mo’gug e tow rom ma dab mu uthum, ma aram e nge gel boch e maruwel rom ngay. Kabfel’ ni ngam tanomnag ban’en nga m’on.

¹¹Dariy angin ni ngam mongmoreg ba porchoyog ni fa’anra mu pag nge k’adem u m’on.

¹²N’en nma yog be’ nib gonop e ra ga’nag bugwan, machane be’ nib balyang e ra kirebnag ir ko thin rok.

¹³Ma tabab ko welthin ni dariy gam’ingin me yan i museg ko thin ni damumuw ni yaba’.

¹⁴Be’ nib balyang e dertal ko numon. Dariy be’ ni manang komang e ra yib ni migid, ma dariy be nrayag ni yog ngodad komang e ran rin’ nga tomuren ni kadm’ad.

¹⁵En nma maruwel nge aw parwon e rib balyang ni mus nga kanawo’en nga tabnaw ma dabi pir’eg.

¹⁶Ba gafgow ba nam ni pilung riy e ka ba pagel ma pi tagagiyeg e go’ mur e yad be tay ni n’umngin e nep’.

¹⁷Machane bfel’ wa’athan ba nam ni pilung riy e ma duwgiliy e tin ngan rin’ ma pi tagagiyeg riy e yad ma abich u ngalan’ e abich, ma yad ma kol gafalrad ma darir chingaw’gad.

¹⁸Fa’anra kaygi gamead be’ nde fal’eg e chigiy ko naun rok, ma ra lul’, ma fare naun e bayi puth nga but’.

¹⁹Mur e ra felfelan’ nigem ma wayin e ra ba’udeg lanin’um, machane galin’ey e dabiyag ngom ni fa’anra dariy e salpiy rom.