Ekeliziasiti 9:4-18

⁴Arini pu toadi si boka hata ia sa lineana koe Tamasa, ura na siki toana si leana hola nia sa laione matena!

⁵Ura sarini pu toadi gilania sapu kote mate si arini, ba sarini pu matedi si loketoṉa pule gilania; loketoṉa dia pinia, meke ta muliṉi palae tu si arini.

⁶Dia tataru, dia kinukiti, dia kinonokono si pukerane tu murimuri taloa; lopu kaqu somana pulei rini sari ginugua pu ta evaṉa pa kauruna sa rimata.

⁷Ke qetuqetu mu la henai gemu ginani, meke napo gemu vaeni mamu qetu mua, ura va malumu igo Tamasa pude taveti.

⁸Mu pokopoko keoro doduru totoso, meke doduru totoso mu lumu nia oela sa batumu.

⁹Mu koa qetu turaṉia sa mua barikaleqe, asa pu tataru nia goi, koari doduru rane koasa tinoa sapu loke guguana. Asa tugo sa tinoa sapu ponigo e Tamasa pa kauruna sa rimata, koari doduru mua rane sapu loke laedi. Ura asa sa laena sa mua tinoa meke sa mua ṉinataṉata sapu mabo nia goi pa kauruna sa rimata.

¹⁰Be sa si tavetia ri na limamu, si mu tavetia pa doduruna sa mua binokaboka, ura pa lovu, vasina pu korapa la ia goi, si loke tinavete, loke binalabala, loke tinumatumae, na loke ginilagilana koa ia.

¹¹Keke tiṉitoṉa pule si dogoria rau pa kauruna sa rimata: Sa hinaqala si lopu tadirini pu rerege sa vinaripera si lopu tadirini pu ṉiṉira, meke sa ginani si lopu la koari pu gilae, sa tinagotago si lopu la koari pu bokaboka, meke na vina lavata si lopu la koarini pu tumatumae; ba evaṉa goto mo pa dia totoso meke lolomo sari doduru arini.

¹²Beto meke, loke tie si tumae nia panavisa kote kamo sa nana totoso. Gua sa igana sapu ta vagi pa vaqara, babe na kurukuru tapuru sapu ta sipata vagi, si sari na tie si ta saputu vagi koari na totoso kaleadi sapu kamo va hodaka koa rini.

¹³Dogoria tugo rau pa kauruna sa rimata sa vina padapada koasa ginilagilana sapu goto mae koa rau:

¹⁴Koa nana si keke vasileana hite sapu visavisa tie koa ia. Meke mae si keke baṉara ṉiṉirana meke mae raza ia, koa vari likohae nia rini meke nama pude huari sari gobana.

¹⁵Ego koa nana pa popoa asa si keke tie sapu malaṉa ba gilagilana, meke asa harupia sa popoa koasa nana ginilagilana. Ba loke tie si balabala ia sa tie malaṉana asa.

¹⁶Ke zama si rau, “Ginilagilana si leana hola nia sa ṉiniraṉira.” Ba loke tie si hiva avosia sa ginilagilana tanisa tie malaṉa, meke loke tie kote va tabea.

¹⁷Sari zinama hitehite tadi na tie gilagilana si mu avosi hola ni sari na kinukili tadi na baṉara koari na tie pekipekidi.

¹⁸Ginilagilana si leana hola ni sari na tiṉitoṉa varipera, ba keke tie kaleana boka huari soku ginugua sapu leanadi.