Ekeliziasiti 4:5-15

⁵Sa tie pekipeki si poloi sari limana, ovia si asa, meke ṉovala pule nia, sina korona tavetavete.

⁶Leana si be tagoa goi si keke sinara lima pa binule hola nia sapu be karua sinara lima ba pa minabo meke hadu lulia sa givusu.

⁷Dogoria pule rau si keketoṉa sapu loke laena pa kauruna sa rimata:

⁸Koa nana si keke tie koa ekeina; loke tuna koreo babe tasina koreo si asa. Loke vina betona sa tinavetavete tanisa, ba sari na matana si lopu manoto ni sari nana tinagotago. “Ura, esei si korapa tavetavete ponia rau,” gua si asa, “meke na vea ke hukata pule nau pude qetuqetu qua?” Hie tugo ba loketoṉa laena, keke ginugua sapu variva hakohakona.

⁹Karua si leana hola nia sapu keke, sina kote noma laena sa dia tinavete.

¹⁰Be hoqa si keke, ba sa nana baere kote ovulu sage pule nia!

¹¹Meke be karua si eko varigara, si kote vari maṉini. Ba vea meke kote boka koa maṉini si keke tie telena?

¹²Ura keke tie si kote boka ta komiti, ba karua si kote boka lavelave pule ni. Na iku sapu ta tavete koari ka ṉeta aroso si lopu kote boka tuturei kumata.

¹³Leana be sa tie vaqura si malaṉana ba gilaena hola nia sa baṉara sapu barogoso meke pekipeki sapu lopu boka vagi vina balau.

¹⁴Sa tie vaqura si gina koa maena pa vetu varipusi meke evaṉae baṉara nana, babe podo maena pa minalaṉa koasa nana butubutu.

¹⁵Dogoria rau sapu doduru pu toa meke ene pa kauruna sa rimata si lulia sa tie vaqura, sa hinobe tanisa baṉara.