Ekeliziasiti 1:9-18

⁹Sapu ele ta evaṉa si kote ta evaṉa pule, sapu ele ta tavete si kote ta tavete pule tugo; namu loketoṉa si vaqura pa kauruna sa rimata.

¹⁰Koa nana beka keke toṉa sapu boka zama guni nia keke tie, “Dotu! Hie keke toṉa si vaqura”? Lokari, na pukerane hola tu ele koa nana; ele koa nana tu sipu lopu ele podo si gita.

¹¹Loke tie si kote balabala i saripu ele mate, meke arini pu lopu ele podo si lopu kote balabala i arini pu korapa mumudi mae koa rini.

¹²Arau sa tie va tumatumae, si koa pa Zerusalema meke baṉara nia sa binaṉara Izireli.

¹³Voriti nia rau telequ pude vilitia meke hata ia pa ginilagilana sari doduru ginugua pu ta tavete pa kauruna sa maṉauru. Hinokara mamatana sa pinaleke sapu vala nia Tamasa koari na tie!

¹⁴Arau ele dogori sari doduru ginugua pu ta evaṉa pa kauruna sa rimata; doduru si loke laedi beto, na guana hadu luli givusu mo.

¹⁵Sapu koqi si lopu kote boka tava toṉoto; meke sapu loketoṉa si lopu kote boka ta nae.

¹⁶Balabala si arau, “Dotu, arau si ele tie nomaqu meke ele soku nau ginilagilana lohidi, hola ni sari doduru pu ele koa baṉara pa Zerusalema; ele soku totoso nonoga ia rau sa ginilagilana meke tinumatumae.”

¹⁷Meke voriti nia rau pude va bakalia sa ginilagilana lohina d, meke sa dinuviduvili meke pinekipeki, ba doṉo gilania rau sapu na hinata hie si guana hadu luli givusu mo.

¹⁸Ura pa ginilagilana sokudi si mae sa tinalotaṉa mamatadi; meke pa tinumatumae sokudi si na tinasigiti nomadi.