Ekeliziasiti 12:1-12

¹Mu balabala ia si Asa pu tavetigo, koari na rane pu korapa vaquramu, sipu lopu ele kamo sari na rane tasunadi meke sipu lopu ele barogoso si goi, meke kote zama, “Namu loke qinetu si vagi nia rau koasa qua tinoa,”

²sipu lopu ele huporo sari na kalalasa rimata, meke sari sidara na pinopino, meke sipu lopu ele pule sari lei mudi ruku;

³totoso neneqara sari tie kopu vetu, meke koqoho sari tie ṉiṉira, totoso visavisa sari na livo meke sari mata si rida.

⁴Mu balabala ia si Asa pu tavetigo totoso nuli sari taliṉamu, meke lopu ta avoso sari vevehe pa siraṉa, totoso vaṉunu sari tie koari na kabodi rina kurukuru tapuru, ba sari na vevehe hire ba guana seu tu;

⁵totoso matagutu ni rina tie sari vasidi ululudi meke sari tinasuna pa siraṉa; totoso keo beto sari kalu meke rizu mamata sari na inene meke soku hiniva si lopu ta boka mo, meke la pa nana popoa pa lovu sa tie, totoso taruqoqo si arini pa siraṉa.

⁶Mu balabala ia sa Tamasa, sipu lopu ele mate si goi, guana ta kumata sa seni siliva, babe poraka sa baolo qolo; sipu lopu ele ilasa sa palepalekeana kolo pa tototolo, babe kaleana sa iku pa berukehe,

⁷meke sipu lopu ele pule la pa pepeso sa tini, meke sa maqomaqo si pule la koe Tamasa pu poni vatua.

⁸“Loke laena, loke laena!” gua si rau, sa tie va tumatumae. “Doduru tiṉitoṉa si loke laedi!”

⁹Arau sa tie va tumatumae si gilaena, meke va karovo tinumatumae si rau la pa tie. Balabala, viliviliti, meke va toṉotoṉoti rau sari na zinama tumatumae.

¹⁰Hatai rau, sa tie va tumatumae, sari zinama sapu gotogoto, meke sapu kuberi rau si toṉoto meke hinokara.

¹¹Sari zinama tumatumae si guana kolu sekeseke, sari vinarigara zinama ginilagilana si guana poka pa hubina sa kolu pude kalaha sipi sa Sepati tadigita, sa nada Tamasa.

¹²Tuqu, keke ginugua pule si maqu va balau nigo. Sa kubere va soku buka si loke vina betona, meke sa voriti pude va nonoga si variva mabona.