Ekaresia 13:25-45

²⁵John da saramana dadabari dae iri, nu eredo eminge sisira: ‘Ne nange nange erekotevu? Na mavejori? God Genembo gategedo furare dae sisira, jo namo iraeri. Kote givu! Genembo amo amboda furarira. Na ijoghakori, nu teria bekári,’ John aminge sisira.

²⁶“Avori, nanda nano namendi, Abraham da sasingu a kotugo namanenda gitofu eminda tumonde baingheraeva, God namonde nange sonembari jebuga tambarera ainda binó ava namondekena mutiri ojighira.

²⁷Namonde God tumonderaera avata, Iesu namondeda ari ekoko seghe fugari dae sedo fusira ava, evetu genembo Jerusalem aminda nenda babojegaride dabade, ne buniseri. Ne Jangutari da Sifo evovodae God da feroveta da geka tegedo, ainda tuka jo kasama ae edo ghuseri. Jo kasama ae edo ghusera avata, Iesu daoro ambare dae sero, God nu rea nunda ferovetakena osa saoro dae sisira, ainda beká ava isagha usira.

²⁸Ne Iesu daoro ambare dae sedo, nunda ari ekoko tava usera avata, jo tambae edo, nu Rome embo da kotofu Pilate kena, Iesu dari ambare dae sedo benunu siseri.

²⁹Amingero, God rea sisira amo, geka isambu isagha usira. Etiri dadabetiri, Iesu ambiri gido, mendeni era nunda tamo korosida ghe budo era furuguseri.

³⁰“Amingetero, God setiri Iesu ambarida ghe jebuge erorusira.

³¹Iesu jo ambae irise, evetu genembo mendeni nunda karona edo, nemonde Frovensi Galilee ghedo Jerusalem isera amo, nu ambarida ghe jebuge erorusira ainda amboda nemokena isagha eari gido ghuseri. Gido ghusera ava, ne oroko Israel embokena Iesu da Bino ava osa seraera.

³²“Namane aindae sedo God da Bino ava sari dae sedo refera. God nu beka gagojuse, rejoá namanenda abuamanekena sisira, oroko ava namondekena isagha etira. Iesu jebuge erarira aindae, God setiri ne nunda Yaru Divari Buku aminda, tano etoto ainda jokáda eminge gefuseri: ‘Ni nanda Mandiri. Na oroko nimokena resena, “Na ninda Afa bekári,” ’ aminge gefuseri.

³⁴Kotugo God nange sari, Iesu ambarida ghe jebuge eredo irari nunda tamo jo betae arira ainda geka ava, God setiri nunda mendeni eminge gefuseri: ‘Na nange David kaifa use esimbuge gogoghombusena aminga ava, ni barago kaifa use esimbugarena.’

³⁵Kotugo tano eninda, God eminge setiri gefuseri: ‘Ninda saramana kato ninda geka ningi gogoghombarira. Ava sedo, ni saso nunda tamo jo ofofoda betae arira,’ aminge gefuseri.

³⁶“David nunda sifoda, God da uju ava use, God da Geka ningido ambududurusira. Ambiri, budo era nunda nombuamane da dengesida furugetero nunda tamo betisira.

³⁷David da tamo betisira avata, God setiri nunda Genembo ambarida ghe jebuge erorusira, ainda tamo jo betaeri.

³⁸“Avori, nanda nano namendi, kote gogoghombevu! Namane nangae Iesu da javoda vironu seraera amo, God nange nange ari ekoko kote doyeraira ava, Iesu da javoda ijugeraera. Moses da Gekaimi namonde jo God kena jebugae arera Avata mave Iesu da javoda tumondarira amo, God nunda ari ekoko kote doyari, nu jebugarira.

⁴⁰God da feroveta rea sisera ava, erá nemokena siroreure dae sise, kaifa e gogoghombevu! Feroveta amo, ne eminge siseri:

⁴¹‘Dere jirari kakato, kote givu! Na saramana eni aono nenda sifoda sirorari gido, ne jo kasama ae areva. Mave ainda beká ijuge gogoghombarira avata, ne jo ningido tumondae areva. Ava sedo, gido dudukughuse ambuvu!’”

⁴²Paul nu geka aminge setiri dadabetiri, Paul nu Barnabas ghae eredo era, dengoro indari kamboda+ ghe buvurutero natofo siseri, “Fura eninda, Jangutari da Sifoda fuvu, geka sekago saovo ningore!” aminge siseri.

⁴³Sedo, Jusi embo mendeni a Jusi embo da gitofu mendeni God tumondedo ghusera aimi, ne isambu eredo Paul nengae Barnabas ghae da amboda iseri. Ero, Paul Barnabas ghae mo, natofo God da Geka ningoro dae sedo, a God fakina futusira ava baoro dae sedo, nengae dengoro induduseri.

⁴⁴Fura dabako dadabetiri Jangutari da Sifoda, evetu genembo isambu reighi Antiok aminda, Bajari da geka ningari dae sedo fera totoruguseri, daba daba jo furaeri.

⁴⁵Totorugetero, Jusi embo, evetu genembo digari totorugusera ava gido, ne dubo mema useri. Evetu genembo isambu Paul nengae Barnabas ghae da geka tumondusera aindae, dubo mema use, erama Paul geka seure dae sise bureguseri. Buregedo, Paul nengae Barnabas ghaekena dombuda siseri.