Ekalesiyestis 2:9-16

⁹Na yagu sawara parapa sipeyara geware wawaya Jerusalem kwanatune naghoguve simakena naboni. Mmkodi sawaridi tupadi kamodiye, na yagu nuwagiura gemeyani iyakuyoveguna.

¹⁰Sawara akitadi bi akayoveni da ayimatipo, na toudi beraberadi akivina. Tagu sawara tupadi mekodi siyaberagu da ayinuwamiise na avimatipovedi. Bi bagibagi tupadi siberagu da avinuwamiise, yagu bagibagi tupadi miisanina kiiravidiye na nuwamiise akabi.

¹¹Wasina bi sawaridi aberana kiiravidiye parapa anoghota kirakii da kate yagu bagibagi ghamadi, bi akita da bera tupadi na kwebudi, noko ware yanunu taya veraverakwavini na naboni, da getana awaki toudi gwabidima tanayouna mmko kuburina debane.

¹²Wasina bi adagu aninuwanoghonoghota nuwagiura, kawakeekee da neghanegha beradi kiiravidiye. Tomogha iiyabo muriye kiiwawo murinagha inapiika na awaki nada Tagu abera na bada inabera.

¹³Tagu akita da nuwagiura na iwaratete kirakii geware neghanegha naboni, mayimayiyina yeghana na imiise geware wiididibara naboni.

¹⁴Wawaya nuwanuwagiurina matanama yakita da mebo yanono, bi wawaya kawakeekeena na ware wiididibare iyapeepewa. Bi gegha, akovi da berana tanagha yapiika nokodi wawaya bata biiyadi.

¹⁵Wasina bi awonena mayegu bo, “Yagu rabobo na mayimayiyina wawaya kawakeekeena yana rabobo na naboni.” Bi awona bo, “Mmkona bada basuna gegha. Na nuwagiura kirakiima awaki akabi?”

¹⁶Getana da iiyabo, wawaya nuwanuwagiurina inanoghotamayenina bo wawaya kawakeekeena inanoghotamayenina. Wawaya nuwanuwagiurina yarabobo na mayimayiyina metagha wawaya kawakeekeena yarabobona naboni.