Eclesiastés 9:2-18

²Bela dulemar yopira guedbimalad: Dule-innikidaeddibe, dule-ichakwadaeddibe, amba yopira burgwedsemalad. Dule-nueddibe, dule-isganadibe, amba yopira burgwedsemalad. Dule-swilidikiddibe, dule-swilidiksuliddibe, amba yopira burgwedsemalad. Dule-ibmar-ogumakar-ukeddibe, dule-ibmar-ogumakar-uksuliddibe, amba yopira burgwedsemalad. Dule-ibmar-nued-imakdeddibe, dule-ibmar-isgana-imakdeddibe, amba yopira burgwedsemalad. Dule-ibmar-ise-sogar-imakeddibe, dule-ibmar-ise-sogar-imaksuliddibe, amba yopira burgwedsemalad.

³We-napneggi, ibmar-imakleged-abargi, we-ibmar gwen nabir nosulid: Bela dulemar na yopira guedsemalad. Deginbali, dule e-gwagegine, ibmar-isganaginbi binsadiid. Dule-gudiidi, unnila galagwensuli binsadiid. Ar bela burgwemaloedbiid.

⁴Degisoggu, dule na dule-bamalad-abargi dula-garmakdiir, wis nubin itoged. Agala an soged: Rey-burgwedba, dule-belagwad-dulagudigued, bur nuedid.

⁵Ar dulemar amba dula-gudimaladi, e-burgwemaloed na wismalad. Dule-burgwismaladdina bar ibmar-abemaisurmalad, ar bar-itomaisurmalad. Deginbali, gwen egi bar-binsalesurbalid.

⁶Ar e-daedi, e-sabguedi, e-sae-itogedi, ibmarbina-sulibinsa-itogedi, burgwisadgi, bergusiid. Ar we-napneggi, gannar weyob-guoedgi-binsaodeeye bar binsamaiosulid.

⁷¡Weligwaledgi mas be gunne! ¡Yeer-itogedgi vino be gobbali! Ar Bab-Dummad be-ibmar-imaksadi, yeer be-ibe daksad.

⁸Na be mor-dagudikmaladbi yodigu guo, gwallu-wawad nonogi be magakwaa-gudigu guo.

⁹Na be ome-bela-bela-abegedbogwa, bane-bane wergudii gusun. Ar Bab-Dummad, we-napneggi sikwas-gudiguega be-imaksad. We-napneggi, ibagan-gwen-nabir-nanamaisursoggu, na be wegi wergudii gusun. We-napneggi-alamakdiid-nukad, we-werguedi wis bega uklesad.

¹⁰Ibu-ibmar-imaked bega uklenonikile, imakedse be sao, melle be imaksuli guo. Ar be burgwisardi bar arbaosulid, ibmar-wisguleged-igar surbalid, degi, binsaed-nikagued-igar surbalid.

¹¹We-napneggi an negdaknonibalid: Abarmaklegedgi-bengulegedgi dule-sabsur-abarmakedbi emargi obinsulid. Bila-onolegedgi dule-gargangued-nikadbi emargi obinsulid. Dule-binsaed-ibedbi mas gunsulid. Dule-ibmar-wisirbaadbi mani-ibedga gusulid. Dule-nue-garda-wismaladbi e-bina soglesulid. Ar bela dulemarga, imbagwenale, ibagan-nued ega nonidaed, imbagwenale, ibagan-isgana ega nonidabalid.

¹²Deginbali, an daksabalid, dule na e-burgoed-ibagan wissurbalid. Uamar-sakigi-galedamaladyob gued, sikwimar-galedamaladyob gued. Ar dulemar ukiagwar boniganse galeardamogad.

¹³We-napneggi an we-ibmar-daksabalid, egi an nue-durdaksabalid:

¹⁴Neggwebur-bipigwadi dulemar-iche-nika an daksad. A-neggweburgine, rey-buledi neggwebur-suega e-sordamarbo ebiris ambikunoni gusad. We-rey, e-sordamarbo, neggweburgi-dogega dikarba napa arsanyob onakwismalad.

¹⁵We-neggweburgine, dule-wileged gudiid. We-dulede, dule-binsaed-ibedid. We-dule, e-binsaed-nikadbali, neggwebur-bendaksa gusad. Degi-inigwele, dulemala we-dulegi gwen binsassurmalad.

¹⁶Andi sogdo: “Dule-wileged-e-binsaed-nikad isdar-daklege-inigwele, deginbali, e-sunmaked itolebisuli-inigwele, ‘ar garganguedba binsaed-nikaa-ibmar-imaklegedi, bur nuedye.’ ”

¹⁷Dule-binsaedsulidamalad-e-dummad binnasuli-sunmakedba, dule-binsaed-ibed-binnasdikii-sunmaked bur nabir itoleged.

¹⁸Gingimarba, binsaed-nikagued bur sunsogedid. Ar dule ibmar-soggwengi wis nosale, bela ibmar oichoged.