ECLESIASTÉS 3:4-10

⁴Onca tonali para tichocas huan onca tonali para tihuetzcas. Onca tonali para timotequipachos huan onca tonali para timijtotis.

⁵Onca tonali para tiquinsemanas teme huan onca tonali para tiquinsentilis. Onca tonali para tijcuanajnahuas se masehuali huan onca tonali para amo tijchihuas.

⁶Onca tonali para tijtemos huan tijpantis tlamantli huan onca tonali para tijpolos. Onca tonali para titlaajocuis huan onca tonali para tijtepehuas catli ticajoctoc.

⁷Onca tonali para tijtzayanas se tlenijqui huan onca tonali para tiquijtzomas catli tzayantoc. Onca tonali para timocamatzacuas huan onca tonali para ticamanaltis.

⁸Onca tonali para titeicnelis huan onca tonali para titecualancaitas. Onca tonali para tlahuilanalistli huan onca tonali para tlasehuilistli.

⁹Huajca ¿tlaque quitlani se tlacatl tlen nochi itequi catli ohui catli ica mosiyahuiltía?

¹⁰Na nimoilhuijtoc miyac tlen nochi nopa miyac tlamantli tequitl catli Toteco quinmacatoc masehualme para ipan ma motequihuica. Huan ya ni catli niquita.