Eclesiastés 10:3-18

³Mana tantiyacoj upaga llapan rurashanchöpis tantiyachicun manacajpaj yarpashantami.

⁴Gampaj mandaj rabyacurcuptinpis ruranayquipaj caycajtaga ama cachaycuychu. Pasinsacorga rabyasha caycajtapis gasacächinmi.

⁵Cay pachachöga juctapis mana allita ricashcämi. Chaytaga quiquin mandajcunami ruran.

⁶Mana tantiyajcunatami churan mas mandaj cananpaj. Mas mandajpaj alli cajcunatanami churan tacsha mandajlla cananpaj.

⁷Ricashcämi uyway runacuna muntädulla purejta. Rispitädu runacunatapis ricashcämi uyway runacunano chaquillapa puriycajta.

⁸Pipis uchcuta uchcoj cäga chaymanmi yaganga. Pipis curral pergata ojtej cajtaga culebrami cañenga.

⁹Pipis rumita llagllajtaga rumi paquirmi llawarenga. Pipis yantata chejtaj cäga quiquinpis riscumi mutucuycunan.

¹⁰Jächa laguyajta yapay mana afilashpanga callpaycur-rämi mutonga. Chaynömi sumaj yarpachacurcur ruraptenga llapanpis allilla canga.

¹¹Upayächiyta yachajpis manami allinachu manaraj upayächiptin culebra cañiycuptenga.

¹²Yachajcuna rimashanga maysi wiyacuyllami. Mana tantiyacojcunami ichanga quiquinpa contrallanpaj rimanpis.

¹³Paycunaga gallaycunanpita-pacha ushanancamapis parlan mana camacajcunallata.

¹⁴Chay runacunaga mana ushaypami parlan. Shamoj watacunacho imapis päsananpaj cajta pipis mana musyaycaptenga ¿piraj ninman imapis päsananpaj cajta?

¹⁵Mana tantiyaj upa runaga fiyupa ñacarpis yangami arun. Chaymi mana musyanchu siudäman maypa yaycuna cashallantapis.

¹⁶Juc nasyunpa wamralla raynin captenga, mandäshejnincunapis upullar micullar cacuptenga fiyupa llaquipaypämi.

¹⁷Fiyupa allichömi canga juc nasyunpa mandajnin alli captenga. Chaychöga mandäshejnincunapis callpan cananpämi micunan öra micun. Manami upyallar cacunchu.

¹⁸Guella runapaga wasinpa jananpis ushacanmi. Imatapis mana arojpa mana ruracojpaga wasinpis tuninmi.