Echos 13:35-50

³⁵Mag jaaumamua ich ag Jesupai jaauwi, ’Ich ag Salmo gaaipai ĩchab mag sim: “Ẽwandam, pʉch chaai bʉ̈ʉrjã pekau chukhu khitʉm pʉchdëucha jʉr autarr chan pua ʉdʉraa i ëu jẽb ee miiupibamgui” ajim aajem.

³⁶Pãrau khaphʉ nʉmgui ajim anʉm, chadcha Daviin sĩi Ẽwandamau nem jaaumamta wau khitʉʉ awi meetarr. Mag meebaadeewai parhoobam khʉʉn aukheerjemjö ich jöoin dʉ̈i ãba aukhërwi ich ag eepai jẽbeg pajimgui ajim anʉm.

³⁷Mamʉ mag Jesús mor chan bʉ̈ʉrjã ich aukhërtarr jẽb degpai miiubajimgui ajim anʉm, ich Ẽwandamaucha phiriu autarr aawai.

³⁸Maimua amag, ’Khodamnaan, magua pãrau thumaam khʉʉnau khaphʉ aju aai nʉmgui ajim anʉm ich Pabloou, maraun sĩi Jesuuta maach khaibag thum chugpaapʉ̈iju aai sim a jaau wënʉrrʉm.

³⁹Maagwai Moiseeu iek phã pʉatarr gaai jaau simpierr ʉ̈kha nʉmuapai pöd peerdʉba arr khʉʉnaujã Jesús iek ʉ̈khamʉn, jũrr ichdëun chad thum peerdʉ auwia ajaug paapʉ̈imaju, magbarmua tag bʉ̈ʉrjã ich dʉ̈i iekkhõr chukhu nʉisimkhĩir a iekhamajim aajem Pabloou.

⁴⁰Maimua, Khĩir khaphʉ abat ajim aajem, Ẽwandam i jaaumienau ẽsap gaai jaau pʉatarr pãach gaai pam ugua. Mag jaauwi, ich Ẽwandam iek phã simcha jaaubaadëjim aajem, chi Pabloou. Mag irua jaautarr mʉg ajim aajem:

⁴¹“Pãar ar Ẽwandam iek aawaijã warag i wau iekhaajem khʉʉn ũrbat: Mʉʉn Ẽwandamau. Pãach dakhĩir pãrau ag na ooba aajem mua wauju. Mamʉ nem thum magju nawe ãbmua pãrag jaaukhiinjã pãrau ʉ̈khabaju. Mamʉ ya pãach daúa oophöbaadeewaita pãar jãphierr naawijã, ¿pãrau jãgbarju? Pãachdëu ʉ̈khaba arr gaaimua, maigta pãar öju edau” ajim aajem Pabloou, Ẽwandamau ich iek phãpitarr igwia.

⁴²Mag judionaan Ẽwandam iek jaaujem deg jaau naawi daau paaukha phöbaadeeu, judionaan khabam khʉʉn am aig bëewi, deeu ẽudeem semanau jua ʉ̈i nʉm ed paawai ãba biirdʉawaijã ich ag iekpai amachig jaaupijierram aajem, Pabloog.

⁴³Mag ãba biirdʉ naawi aaidʉtkhabaadëm ee, judionaan khapan Pablo Bernabé dʉ̈i wëtum ẽudee wëtjierram aajem, judionaan khabamta eeu ʉ̈khawia judionaan igar theerbagkhatarr khʉʉnpa. Magbaawai mag amach ẽudee wëtum khʉʉnag wawimamua, “Ich jãg thãraucha ʉ̈kha wënʉrrʉmua Ẽwandam pãach daupii aajem gaaita ubʉ nʉisit” aajeejim aajem amag chi Pabloou Bernabé dʉ̈imua.

⁴⁴Maimua chadcha deeu ũwaai jua ʉ̈ʉijem ed pabaadeewai peer phöbör thumta ãbam aig podpa nʉisijim anaabá, Ẽwandam iek jaaumam ũraag.

⁴⁵Mamʉ judionaanau mag atcha õor pöm thʉnʉm oobaawai iekkhõr wauphöbaadëwi, warag Pabloou jaau sim ichaaur õor wawinaa, irig sĩi parhooba iekha phöbaadëjim aajem.

⁴⁶Magbaawai ĩchab Pabloou Bernabé dʉ̈imua warag thãar phĩiuwia iek khẽgkha amag, —Ũrbat keena ajierram anʉm. Chadcha pãragta nacha marau mʉg Ẽwandam iek jaauju aai naajim, mamʉ pãar jãg ʉ̈gthar öbërmaphamjö Ẽwandamagjã ʉdʉʉr pãach peerdʉ aupiba i isegamjö naawai marau judionaan khabam khʉʉnagpa jaau wënʉrrʉmgui ajim aajem,

⁴⁷maach Pör Ẽwandamau thumaam khʉʉnag ich khap amkhĩirta ich iek jaaupi sĩewai. Maagwai chadcha ich Ẽwandam iek gaai ich Jesús igwi, “Iita judionaan khabam khʉʉn atheejã khĩchag ee õtdau phuu dʉnʉmjö sim, durrpierr ich iek ʉ̈kha nʉm khʉʉn thum ichdëuta peerdʉ awaag” a phã simgui ajierram aajem.

⁴⁸Pabloou Bernabé dʉ̈imua mag jaaubarm ũrwia judionaan khabam khʉʉnau amach jʉ̈gʉucha mag amjã peerdʉju aai nʉm a ũrbaawai onegau, “Keena, mʉg Ẽwandam iekhan chadcha chi ajaphamʉugui” ajierram aajem, chadcha thãraucha amachdëu ʉ̈kha nʉm iekhau. Mag thumaa ʉ̈khatarr khʉʉnan, nawe Ẽwandamau ichdëu oowai ich iek ʉ̈khaju khaphʉ wai sĩerr khʉʉn ajim.

⁴⁹Mag jaau nʉmua mag amach nʉm durr eepain maach Pör Jesús iek aaidʉbaadëjim anaabá.

⁵⁰Mag warag Ẽwandam i aaidʉmam oobaawai khĩir mor chigpai jũrr judionaanau amach ee riknaan ʉʉin Ẽwandamag jëeu durraajerr khʉʉn dʉ̈i iekhawia phöbör ee chi pörkha nʉm khʉʉn dʉ̈ijã iekhajierram aajem. Magnaan chad Pabloou Bernabé dʉ̈imua ʉ̈u Aai i jaau durrarrta, am dʉ̈i amachdëu ampierr awi warre amach durrmua jʉrkhʉʉipʉ̈ijierram aajem, aiguim judionaanau.