Ecclesiastes 2:2-18

²Lamna aubaina a riwa da kaka labalababa ma erawa lamna bua. Ma erawana aiwai aiaina e vereverem?

³Nuaulaula a ḡoana-guratei, ma a ḡoei da wine ata umai da orau ita telatela ma kaua opaopai ata kauei, da ata aramanei metauna i aii rava au dobu awari, maranai mara tupona ava au dobu e mamae.

⁴Kaua ḡaeḡaei a vikarei, au numa ḡaeḡaei a voa-naiei ma grape wapui a paewi.

⁵Wapu da peipei a kauei ma ai uauai tapuna ma tapuna a paewi.

⁶Dogo a ḡarai da garewa ma wapaketa i vojijini, lamnei wei wapui a vivituvanei.

⁷Awariu taunola au numa tuputupuai, ma taunola maḡamaḡaui nelarai ma waivinei a gimarai. Au bulumakau ma sipu i maḡa guratana eḡa me aiai ḡelauna au naona au Jerusalem nanare.

⁸Awariu gold ma silver gaegaena ma nanare dobuḡela gulaui ai via. Tauwela nelarai ma waivinei a vimaiei ma guguini inanai aiaii a vivaneiai au numa, au ani vieraerawa. Aiwai a ḡoeḡoei ana tapuna awariu.

⁹Tau a maura ma a vipurapura kaua eḡa me aiai ḡelauna au Jerusalem nanare. Ma wei anatapuna au orana au nuaulaula i mae-kaua.

¹⁰Aiwai a inanai ma a rauoḡarei a vaia, anatapuna a notai da ita vinuaiainiu. Au nola anatapui a kauana-kauei, ma nuaiaina lamna au nola maiana.

¹¹Anina ma aiwai anatapuna a voavoai ma a polepolei, a vinua-notenotei ma a aramanei da wei anatapui lamna anona eḡa, lamna me ive ata viviaḡaḡei wei au dobuna amapo eḡa aiwai tana vaia.

¹²Nuaulaula, bua ma opa anoi a vinua-notenotei. Gulau ana raviepaia, aiwai ḡelauna ina kauei?

¹³Ma aramanei da nuaulaula i aii kaua eḡa me opa, ma lalalaina i aii kaua eḡa me gimtona.

¹⁴Rava nuaulaulana matana au kolana e mamae wate opaopana waguwaguvareina e bababara. Ma aramanei da ravai ruaḡai ai damona tagogi.

¹⁵A vinua-notanota a pa, “Tau ma opaopana ai damona tagogina. Au nuaulaula aiwai ḡelauna ina vereu?” Au nota a pa, “Wei maiteni anona eḡa.”

¹⁶Rava nuanuaulaulai lamna me rava opaopai amapo nai ravaii nuanuata ina vuru. Kapore! Rava nuaulaulauna ma rava opaopana e irairaḡe.

¹⁷Tau lawana a geduaiei, au dobu aiwai anatapuna ta kaukauei iniviara ava e verevereta. Anatapuna kwakwavina, me ive taviviaḡaḡei.

¹⁸Anatapuna au dobu a polepolei a geduaiei, aubaina nai ana voterei, da rava au muriu e nenei aubaii.