Dyan 9:2-23

²Na smalek i dad gal mlalò kenen, manla, “To Tamdò, kan ku butè to ani mdà di ksutan? Simto gamsalà, kenen ku demen dad tuan?”

³Na man Dyisas, “Ise ku i duenan butè ku mdà di kenen salà ku demen i salà dad tuan, bay i duenan du fye fite i bong ktulus Dwata fagu di kenen.

⁴Di klo fa mduh, too ito mimò knayè i mdek deg dini du là mlo nan kakel i kifu na talandè nan gmagan mimò.

⁵Na di klogu fa dini, agu sa i salò lamwa i fandam i dad to di tah tanà.”

⁶Na di kagman Dyisas ani dmulà kenen di tanà, na nimoan fitak mdà di ibalan, na ihokan di mata i to butè.

⁷Na dekan i to butè, manan, “Mdà ge na lngauf di kligu Silom.” (I gumtatek talù Silom dunan mdek.) Na salu i to én ditù du lngauf na di kuléan mite kenen.

⁸Di kite i dademen saldan na dad to gal mite kenen gal mni di laan fa mite, manla, “Ise ani i to gal sudeng na mni?”

⁹Na man i dademe, “Hae, dunan sa.” Kabay man i dademe, “Ise kenen, bay salngad i bawehan.” Kabay man i to én di dale, “Deg sa i dunan.”

¹⁰Taman snalekla kenen, manla, “Na tan i gumdaam mite?”

¹¹Na tmimel kenen, manan, “Satu to dnagit Dyisas mimò i fitak, na ihokan di matagu, na dekan agu lngauf di kligu Silom. Taman salu agu ditù na lngauf, na mdà déén tamite agu.”

¹²Na smalek ale, manla, “Tanè i to manam?” Kabay manan, “Làgu gadè.”

¹³Kafnge én, nebela i to butè salu di dad Farisi.

¹⁴Na i duh kimò Dyisas i fitak di kafguléan i to butè, dunan Duh Kaftud i dad Dyu.

¹⁵Na lêman smalek dad Farisi di to én ku tan i gumdaan mite. Na manan di dale, “Ihokan i fitak di matagu, na kafngegu lngauf tamite agu.”

¹⁶Na man i dademe dad Farisi, “Ise kenen to mdà di Dwata du laan nimen i flalò gablà di Duh Kaftud.” Kabay man i dademe, “Ku to gamsalà kenen, laan gagan mimò tnikeng gambet ani.” Na là salngad i fandam i dad Farisi gablà ku Dyisas.

¹⁷Taman lêmanla snalek i to butè manla, “Tan manam gablà di to én, du manam tafanguléan i matam?” Na tmimel i to butè, manan, “Kenen sa satu tugad Dwata.”

¹⁸Kabay là faglut dad ganlal i dad Dyu ku tagnè butè to ani, na ku tamgulê kenen mdà di kbutean. Taman tlola i tuan,

¹⁹na snalekla, manla, “Too glut kè tingàyu ani, i manyu tagnè butè mdà di ksutan? Tan i gumdaan mite?”

²⁰Na man i dad tuan, “Hae, gadèmi ani tingàmi, na tagnè kenen butè mdà di ksutan,

²¹bay làmi gadè i gumdaan mite, na làmi gadè ku simto i fgulê kenen. Snalekyu kenen du tagablà ktuan, na gamtimel nan kenen gablà di kton.”

²²Én man i dad tuan, du likò ale i dad ganlal i dad Dyu, du satu nawala di kmanla na ku simto mangman na Dyisas i Mgalék Dwata, làla kenen faloh fusuk di gal gusatdò.

²³Taman én duen i dad tuan mangman, “Snalekyu kenen du tagablà ktuan tmimel.”