Dyan 8:29-55

²⁹Na i mdek deg, gal fikit di deg, na laan agu sa tnagak, du i kdee nimògu gaflehew kenen.”

³⁰Na mdà di gman Dyisas ani nun dee dad to faglut di kenen.

³¹Taman man Dyisas di dad Dyu faglut di kenen gine, “Ku fnèyu di nawayu i tdògu gamu, mbaling gamu dad too glut mlalò deg,

³²na gmadè gamu i kaglut, na fagu di kaglut, galwà gamu mdà di kaglifanyu.”

³³Na manla di kenen, “Gami dad bel Abraham, na là gami lmen lifan di balù simto. Kan ku manam galwà gami di kaglifanmi?”

³⁴Na tmimel Dyisas, manan, “Tulengu gamu i kaglutan, ku nun to gamsalà, kenen sa i lifan di salà.

³⁵Na kagkah i lifan, landè kaglutan mnè di gumnè mfunan kel di landè sen, bay i tingà, fakay mnè di malay maan kel di landè sen.

³⁶Taman ku én falwà gamu di kaglifanyu i Tingà Dwata, too glut galwà gamu.

³⁷Gadègu gamu dad bel Abraham, bay knean kayèyu agu fnati, du làyu dnawat i tnalùgu.

³⁸Én mangu di gamu i fite Màgu deg, bay gamu, én nimòyu i man màyu di gamu.”

³⁹Na tnimella kenen, manla, “Abraham i màmi.” Kabay man Dyisas di dale, “Ku glut gamu dad ngà Abraham, taganbetyu moon i nimoan.

⁴⁰Na én alò gmangu di gamu i kaglut lingegu mdà di Dwata, bay knean kayèyu agu fnati. Kabay ise ku salngad én nimò Abraham.

⁴¹I nimòyu ani salngad sa i nimò màyu.” Na manla, “Ise gami dad ngà magu dungan, du satu alò màmi, dunan Dwata.”

⁴²Na man Dyisas di dale, “Ku glut Dwata i màyu takanbongyu agu nawa, du salu agu dini mdà di kenen. Ise ku mdà di deg knayè, bay Dwata i mdek deg dini.

⁴³Kan ku làyu glabat i mangu? I duenan du fbakong gamu du làyu gagan flinge dun.

⁴⁴I màyu dunan Satanas, na i knayèyu nimò dunan i knayè i màyu. Tagnè kenen manò mdà fa di kagatbuan, na laan nsen i kaglut du landè sa kaglut mnè di kenen. Di ktulenan kéng, én duenan du takenen kagkah. Tagnè kenen gal tmulen kéng, na kenen gumdà i kdee kakakéng.

⁴⁵Kabay du tmulen agu i kaglut, na én i duenyu là faglut deg.

⁴⁶Landè di gamu gamtulen balù satu sasè nimògu. Na ku glut i mangu, kan ku làyu agu fnaglut?

⁴⁷I dad ngà Dwata, too ale flinge na mimen i manan, na i duenyu là flinge du ise gamu dad ngaan.”

⁴⁸Na tmimel i dad Dyu, manla, “Too glut i manmi, én gumdaam di Samériya, na nun busawam!”

⁴⁹Na tmimel Dyisas, manan, “Landè sa busawgu. Én nimògu fdatah i Màgu, bay fdanàyu agu.

⁵⁰Làgu mngabal kdayen i dad to, bay kayè Dwata ku dnayenla agu, na kenen i mukum ku glut i mangu.

⁵¹Tulengu gamu i kaglutan, ku nun to mimen i tdògu là kenen mati.”

⁵²Na man i dad Dyu, “Toomi nan gadè nun busawam! Du balù Abraham na i dad tugad Dwata di muna fa, i kdeela tamati, bay balingam man, ‘Ku nun to mimen i tdògu là kenen mati.’

⁵³Kayeam man ge kè mdatah fa di gutambulmi Abraham. Tamati kenen na lêman i dad tugad Dwata. Na simto ge kè?”

⁵⁴Tmimel Dyisas, “Ku deg dmayen i ktogu landè btas i kdayen én. Kabay i dmayen deg i Màgu, dunan i manyu Dwatayu.

⁵⁵Kabay làyu kenen dilè, bay deg, dilègu kenen. Na kaflingenta dun ku mangu làgu kenen gadè mbaling agu tmulen kéng salngad gamu. Kabay làgu tmulen kéng du gadègu sa kenen, na nimengu i manan.