Dyan 4:27-39

²⁷Na kafnge ayé, ta lê kel i dad to galan tdò, na tikeng ale du ta yé demen stulen libun. Bay landè balù satu di dale gamlas smalek ku dét i knayèan, na ku dét i duenan stulen di kenen.

²⁸Bay i libun ayé, tnagakan i namuhan, na ta samfulê di lunsud du tnulenan i dademen,

²⁹na manan, “Flal gamu na neyeyu. Nun to ditù ta tulenan do i kdee dad nimògu. Keng kenen Krayst, i Mgalék Dwata.”

³⁰Na ta mdà ale lamwà di lunsud ayé du salu ale ditù di ku Dyisas.

³¹Na di lam i dad to ayé là fa kel di ku Dyisas, fakdo dad to galan tdò di kenen, manla, “Amu, beg ge kmaan.”

³²Bay man Dyisas di dale, “Nun sa do knaan i làyu gadè dun.”

³³Na sasalek i dad to galan tdò, manla, “Keng ta nun tmunda dun knaan?”

³⁴Na man Dyisas di dale, “Yé do knaan dunan i kimen-gu i knayè Mà, dunan i mdek do, na i kafngegu i fimòan do.

³⁵Ise yé galyu man, ‘Fat bulen klon kel i bang kamtu?’ Bay ani man-gu di gamu. Neyeyu i dad fele du ta tagah, na ta gablà ale kantu.

³⁶I to kamtu, nun sukéyan, na santifunan i dad ulê du fye gfunla i nawa landè sen. Na yé duenam man, i to mlah na i to kamtu, sasatu ale flehew.

³⁷Taman, too glut i galla man, ‘Mahal i to mlah, na mahal i to kamtu.’

³⁸Ta dekta gamu kamtu di ise gamu fanlah. Dademe i mlah dun, bay gamu gamdawat lubayla.”

³⁹Na nun dee dad to ftoo di ku Dyisas mdà di lunsud ayé di Samarya du mdà di ktulen i libun ayé, du manan, “Ta tulenan do i kdee dad nimògu.”