Dyan 20:6-26

⁶Kafnge én, talê kel Fiter, na fles kenen fusuk, na teenan safut fungas laweh Dyisas,

⁷na lêman safut fungas i ulun, bay maglulun na mahal gugkahan.

⁸Kafnge én, fusuk i mlalò ku Dyisas muna kel gine, na teenan kdee ani, na faglut kenen Dyisas tamto lêman.

⁹Kabay làla fa glabat i gsulat di Tnalù Dwata, mték Dyisas mdà di fati.

¹⁰Kafnge én, mdà i lwe to én mulê.

¹¹Kabay Méri déén kenen di lwà i gulambang mngel, na di kngelan fkagò kenen du smalil di lam i lbang,

¹²na nun teenan lwe kasaligan Dwata kamlaweh bukay. Sudeng ale déén di gufkahla laweh Dyisas, satu gsen di ulu, na satu gsen di blì.

¹³Na snalekla Méri, manla, “Libun, tan nngelam?” Na manan di dale, “Nun dad to mwè laweh Amugu, na làgu gadè gufkahla dun.”

¹⁴Na di kafngen man ani, falê kenen, na teenan Dyisas tadag déén, bay laan kenen dilè.

¹⁵Na man Dyisas di kenen, “Libun, tan nngelam? Simto fanngabalam?” Na man nawa Méri ku kenen to gal mifat dad fule déén, taman manan, “Fà, ku ge mwè lawehan, tulenam deg gufkaham dun, du nwègu.”

¹⁶Kabay man Dyisas, “Méri.” Na smalu Méri di kenen, na manan di talù Hibru, “Raboni.” I gumtatek talù Raboni, dunan To Tamdò.

¹⁷Na man Dyisas di kenen, “Nangam agu nagot, du là agu fa salu di Màgu. Kabay salu ge di dad flanekgu, na tulenam dale na fan agu salu di Màgu Dwata di langit, dunan Màyu na Dwatayu.”

¹⁸Taman mdà Méri Magdalin salu di dad mlalò ku Dyisas, na tulenan dale tateenan i Amu. Na tulenan kdee gman Dyisas di kenen.

¹⁹Na di kbutang di duh Linggu, stifun dad gal mlalò ku Dyisas di satu gumnè, na tnakabla gufusuk du likò ale dad ulu dad Dyu. Na tatì msut déén Dyisas tadag di blengla, na manan di dale, “I ktanak nawa mnè di gamu.”

²⁰Kafngen man ani, fiten dale dad falelan na lohokan. Na too ale lehew du tateenla Amula.

²¹Na lêman man Dyisas di dale, “I ktanak nawa mnè di gamu. Dekta gamu salngad i kdek Màgu deg.”

²²Na di kafnge Dyisas mangman ani, nyufan ale, na manan, “Dnawatyu Mtiu Tulus.

²³Na mdà ani ku nlifetyu salà satu to nlifet Dwata salaan, bay ku làyu nlifet salaan là sa nlifet Dwata dun.”

²⁴Na Tomas, satu di dad sfalò lwe gal mlalò ku Dyisas, galla tlo Fingin, là déén di kfite Dyisas kton di dale.

²⁵Taman man dademen di kenen, “Tateenmi Amuito.” Kabay man Tomas di dale, “Silang agu faglut tamték kenen ku teengu dad seeyan di falelan na doggu tnalògu di dad dalan gumatak i lansang, na fkahgu kmalgu di lam i gumdak di lohokan.”

²⁶Na kafnge walu butang, talêman stifun dad gal mlalò ku Dyisas di lam satu gumnè, na déén Tomas. Magtakab gumnè, bay msut Dyisas, na tadag déén di blengla, na manan di dale, “I ktanak nawa mnè di gamu.”