Duku 9:7-41

⁷Kɛ̀ Edɔti Tetidɑki, Kɑdidee kóo kpɑ̀ɑ̀tìi keè dɛ̀ɛ̀ dɔ̀ɔ̀ri kɛ̀ dɛ̀ɛ ò di kɛ yɛ̃́ bɛ̀mɑbɛ̀ do túmɛ̀ Isɑ̃ɑ̃-Bɑtiisi weè yɑ̃̀ńtɛ́.

⁸Kɛ̀ bɛtɔbɛ̀ tu: Edii weè wɛ̃̀tɛní. Kɛ̀ bɛtɔbɛ̀ tu: Kuyie mpɑ̃ɑ̃nɑ́ɑǹtì nɑ́ɑm̀bɛ̀ dimɔ̀nnì kɔbɛ kóò mɔù weè yɑ̃̀ńtɛ́.

⁹Kɛ̀ Edɔti dɔ̀: N duɔ́ nkɛ̀ bɛ̀ fèútɛ́ Isɑ̃ɑ̃ kɛ̀ we nnɛ́ nwe n wɛ̃̀tɛ kɛ yo kɛ̀ bɛ̀ nɑ̀ɑ́ nwèè kpɛ́í? Kòo nwɑnti kɛ bo ò yɑ̀.

¹⁰Kɛ̀ Yesu tɔ̃rɛ̀ɛ wɛ̃tɛní kóò nɑ̀kɛ́ yɛ̀ dɔ̀ɔ̀ dɛ̀ɛ̀ kó dimɑ̀ɑ̀, kɛ̀ bɛ̀ɛ nɛi kɛ́kɛntóo dihɛì bɛ̀ tu dì Bɛtisɑidɑɑ di bíɛ́kɛ̀.

¹¹Kɛ̀ ditĩ̀nnìi ò yɑ̀ kóò tũ̀nnɛ, kɛ̀ Yesu bɛ̀ cɔutɛ́ kɛ́ mbɛ̀ nɑ̀ɑ́ nKuyie nkpɑ̀ɑ̀tìyuu kpɛti, kɛ miɛkùnko bɛ̀ɛ̀ mɔ.

¹²Diyiè yùnnɛ́ dìì mɔ̀nnì kɛ̀ Yesu tɑncɔ́ùmbɛ̀ tɛpíítɛ̀ nɛ̀ bɛ̀dɛ́bɛ̀ɛ tɔ́ɔ́nní o borɛ̀ kóò nɑ̀kɛ́ kɛ dɔ̀: Cíɛ mbɛnìtìbɛ̀ kɛ̀ bɛ̀ɛ kɔtɛ kɛ́wɑmmú mudiì, nɛ̀ yɛdúɔ̀, kɛ yɛ̃́ ti bomɛ̀ diɛ ndikpɑ́ɑ̀ miɛkɛ bɑ́ dɛ̀mɑrɛ̀ í bo.

¹³Kɛ̀ Yesu bɛ̀ tɛ̃̀ńnɛ́ kɛ dɔ̀: Díndi di mɔ́mmɔmbɛ duɔ́nnɛ̀ bɛ kɛ̀ bɛ̀ɛ di. Kɛ̀ bɛ̀ dɔ̀: Ti mɔkɛ pɛ̃́ɛ̃̀bɛ̀ bɛ̀nùmmù ndi nɛ̀ siyĩĩ sìdɛ́sì mɑ́ɑ̀! Yɑ́ɑ̀ ti kɔtɛ kɛ́dontɛ́nímu kɛ́duɔ́ nkunììti kuu?

¹⁴(Dɛ kó bɛnìtìbɛ̀ do bo mbo sikɔupísìnùmmù (5000)). Kɛ̀ Yesu nɑ́kɛ́ o tɑncɔ́ùmbɛ̀ kɛ dɔ̀: Kɑnnɛnɛ̀ bɛ sipísìnùmmù sìnùmmù.

¹⁵Kòo tɑncɔ́ùmbɛ̀ɛ yie nkɛ́ bɛ̀ kɑ̀nnɛ bɛmɔu,

¹⁶kɛ̀ Yesu túótɛ́ pɛ̃́ɛ̃̀bɛ̀ bɛ̀nùmmù nɛ̀ siyĩĩ sìdɛ́sì, kɛ bɔ́útɛ́ kɛĩ́nkɛ̀, kɛ́sɑ̃ntɛ Kuyie kɛ́ bɛ̀ wɛ́rí kɛ́duɔ́ nho tɑncɔ́ùmbɛ̀, kɛ̀ bɛ̀ɛ totí bɛnìtìbɛ̀.

¹⁷Kɛ̀ bɛ̀ɛ cɑ́ɑ́kɛ́ bɛmɔu kɛ́nsɑ̀nnɛ̀, kɛ̀ dɛ̀ɛ súɔ́ nkɛ́píɛ nyɛmɔ́mmùyɑ́kɛ̀ tɛpíítɛ̀ nɛ̀ yɛ̀dɛ́ɛ̀ kɛ̀ bɛ̀ɛ tɔ.

¹⁸Diyiè mɑrì kɛ̀ Yesu mbɑ́ɑ́ nKuyie nhomɑ́ɑ̀ borɛ̀, kòo tɑncɔ́ùmbɛ̀ɛ kɔtoo kòo bɛ̀ bekɛ kɛ dɔ̀: Bɛnìtìbɛ̀ yɛ̃ n tú we?

¹⁹Kɛ̀ bɛ̀ɛ ò tɛ̃̀ńnɛ́ kɛ dɔ̀: Bɛ̀mɑbɛ̀ yɛ̃ nhɑ tú Isɑ̃ɑ̃-Bɑtiisi, kɛ̀ bɛtɔbɛ̀ yɛ̃ nhɑ tú Edii, kɛ̀ bɛtɔbɛ̀ yɛ̃ nhɑ tú Kuyie mpɑ̃ɑ̃nɑ́ɑǹtì nɑ́ɑm̀bɛ̀ dimɔ̀nnì kɔbɛ kóò mɔù kɛ yɑ̃̀ńtɛ́.

²⁰Kɛ̀ Yesu bɛ̀ bekɛ kɛ dɔ̀: Díndi tɑ́, di yɛ̃ n tú we? Kɛ̀ Piɛrii ò tɛ̃̀ńnɛ́ kɛ dɔ̀: A tú Kirisi nwe Kuyie ntɔ̃nní wè.

²¹Kɛ̀ Yesu bɛ̀ cɑu nweti weti kɛ dɔ̀ bɛ̀ bɑ́ɑ́ yie nkɛ́ tì nɑ̀kɛ́ òmɔù.

²²Kɛ yíɛ́ kɛ dɔ̀: Onìtìbirɛ dò nkɛ́fɛ̃́ṹtɛ́mu mɛdiɛ̀, kɛ̀ Kuyie ncĩ́ɛ̃̀tɛ̀ kó bɛkótíbɛ̀ nɛ̀ ikuɔ́ nìùbɛ̀ kó bɛkótíbɛ̀ nɛ̀ ikuɔ́ wɑ̃ɑ̃̀bɛ̀ kɛ̀ bɛ̀ɛ ò yetɛ kóò kùɔ, diyiè tɑ̃ɑ̃́nnì yiè kòo yɑ̃́ntɛ́,

²³kɛ́deè kɛ́ bɛ̀ nɑ̀kɛ́ bɛmɔu kɛ dɔ̀: Kɛ̀ wèè dɔ́ kɛ́ n tũnnɛ wèe bútínnɛ́ omɑ́ɑ̀ kɛ́ntɔ o dɑpɑ̃ɑ̃tí yɛwe yɛmɔu kɛ n tũ.

²⁴Kɛ yɛ̃́ wèè bo ndɔ́ kɛ́dɛɛtɛ́ o fòmmu ò yóó mù fétìnnɛmu, kɛ̀ wèè fétìnnɛ o fòmmu n kpɛ́í kòo mù dɛɛtɛ́.

²⁵Kutenkù kuù nkpɛrɛ bo dɔɔ̀ bɑ onìtì kɛ́nsɑ kòò dɛ̀ mɔ̀kɛ dɛmɔu kɛ nɛ́ cɑ̀kɛ omɑ́ɑ̀ yoo ò fétìnnɛ o fòmmu.

²⁶Wèè bo nni mmɔkɛnɛ̀ mí nhonìtìbirɛ ifɛi m múnkɛ bo nhò mɔ̀kɛnɛ̀ ifɛi m bo nwɛ̃tiní dìì yiè nɛ̀ tikpetì nɛ̀ n cicɛ kpɛti kɛ nɛínnɛ̀ Kuyie ntɔ̃rɛ̀.

²⁷N di nɑ́ɑ́ mmɔ́mmuɔ nwe díndi bɛ̀ɛ̀ bo diɛ ndi kó bɛ̀mɑbɛ̀ yó nkpɑɑ́ fòùmu kɛ́yɑ̀ Kuyie nkpɑ̀ɑ̀tìyuu.

²⁸Yesu bɛ̀ nɑ̀kɛ́ mɛmmɛ kɛ́deè, kɛ̀ dɛ̀ mmɔkɛ yɛwe yɛ̀ni mɛ̀ ndòmmɛ̀ kòo yú Piɛri nɛ̀ Isɑ̃ɑ̃ nɛ̀ Isɑku, kɛ̀ bɛ̀ɛ dekɛ ditɑ̃rì mɑrì ĩ́nkɛ̀ kɛ bo bɑ́ntɛ̀ Kuyie.

²⁹Ò bɑ́ɑ́ ndìì mɔ̀nnì Kuyie nkòo ììkɛ̀ɛ ceetɛ kòo yɑ̀ɑ̀tìi pɛikɛ kɛ́miɛtɛ̀.

³⁰Kɛ̀ bɛ̀ nyóó dɑɑtɛní kɛ́yɑ̀ bɛnìtìbɛ̀ bɛ̀dɛ́bɛ̀, Mɔyiisi nɛ̀ Edii kɛ̀ bɛ̀ ò nɑ̀ɑ́nnɛ̀.

³¹Kɛ̀ Kuyie nkó tikpetì bɛ̀ fitɛ́ kɛ̀ bɛ̀ ò nɑ̀ɑ́ nhò yóó kú mɛ̀ɛ̀ botí Sedisɑdɛmmu.

³²Piɛri nɛ̀ o nɛ́pobɛ̀ bɛ̀ do yɛ̃̀ nkɛ́duɔ́mu kɛ́nhenniní kɛ́yɑ̀ Yesu kó tikpetì nɛ̀ bɛnìtìbɛ̀ bɛ̀dɛ́bɛ̀ bɛ̀ɛ̀ do ò còḿmúnɛ̀.

³³Edii nɛ̀ Mɔyiisi, bɛ̀ ìtɛ́ dìì mɔ̀nnì kɛ̀ Piɛrii nɑ́kɛ́ Yesu kɛ dɔ̀: Dɛ̀ wennimu kɛ dò ntí mbo diɛ, ti bo dɔɔ̀ titouti tìtɑ̃ɑ̃ti, fɔ̃́ nkumɑ́ɑ̀, Mɔyiisi kutɛkù, Edii kutɛkù. (Piɛri do í yɛ̃́ ò nɑ̀ɑ́ nkɛ tú mù).

³⁴Ò kpɑɑ́ kɛ mɛ nnɑɑ́ nkɛ̀ diwɛtirì mɑrìi kɔtɛní kɛ́ bɛ̀ dɑ̀tínnɛ́, kɛ̀ kufɔ̃wɑɑ́ mpĩ́ nYesu tɑncɔ́ùmbɛ̀ bɛ̀ yɑ̀ dìì mɔ̀nnì diwɛtirì bɛ̀ dɑ̀tínnɛ́mɛ̀.

³⁵Kɛ̀ mɛtɑmmɛ̀ mɑmɛ̀ɛ yɛ̀nní diwɛtirì miɛkɛ kɛ tú: Yie nweè tu m birɛ n tɑ̃ɑ̃tɛ́ dɛ̀, nyíénnɛ̀ o kpɛti.

³⁶Bɛ̀ yóó keè dɛ kó mɛtɑmmɛ̀ kɛ̀ Yesu weè mɑ́ɑ̀ dɛ̀ kpɑɑ́. Dɛ kó yɛwe miɛkɛ kɛ̀ Yesu tɑncɔ́ùmbɛ̀ ndò yúóó bɛ̀ í nnɑ̀kɛ́ òmɔù bɛ̀ yɑ̀ dɛ̀.

³⁷Kɛ̀ dɛ̀ɛ wentɛ́ kɛ̀ bɛ̀ ncutiní ditɑ̃rì, kɛ̀ ditĩ̀nnìi diɛrìi kɔtɛní kɛ́co Yesu.

³⁸Kòo mɔùu kuɔ́nko ditĩ̀nnì cuokɛ̀ kɛ dɔ̀: Okótì, dɑɑtɛ m birɛ kpɛ́í! N dɛ̀ mɔ̀kɛ dɛmɑ́ɑ̀ ndi,

³⁹kɛ̀ dibɔɔ̀ mɑrì ɔ̃ɔ̃ dɛ̀ pĩ nkɛ̀ dɛ̀ nwúótí, kɛ̀ dì dɛ̀ kpékíi, kɛ̀ tinɔ́ntɔ̃ũpùùtì yìɛ̀ dɛ̀ nùù, bɑ́ dì bɑ́ɑ́ cɑ̃rikɛ kɛ́ítɛ́, kɛ́nyiti kɛ dɛ̀ fɛ̃́ũ mmɛdiɛ̀.

⁴⁰Kɛ̀ m bɑ́ntɛ̀ ɑ tɑncɔ́ùmbɛ̀ kɛ yɛ̃ mbɛ̀ɛ dì bɛ̀ti kɛ̀ bɛ̀ yĩɛ̃kɛ.

⁴¹Kɛ̀ Yesu bɛ́i nkɛ dɔ̀: Itookperí yɛmbɛ̀ díndi bɛ̀ɛ̀ dɔ̀ɔ̀ri mɛyɛi, míì yó nhɑ̃ kɛ di bonɑ̀ɑ̀? Míì yó nhɑ̃ kɛ di tɔɑɑ̀? Kɔtɛnní diɛ nhɑ birɛ.