Duku 11:19-52

¹⁹Kɛ̀ nsɑ̀ kɛ̀ m bɛ̀tì yɛbɔkɛ̀ nɛ̀ obɔɔkpɑ̀ɑ̀tì kó muwɛ̃rímú mmu di kɔbɛ nɛ́ yɛ̀ bɛ̀tì nɛ̀ we nkɔ̃mu? Dɛɛ̀ kpɛ́í nte kɛ̀ di kɔbɛ yóó di bekɛ́nɛ̀.

²⁰Kɛ̀ m mɛ mbɛ̀tì yɛbɔkɛ̀ nɛ̀ Kuyie nkó muwɛ̃rímú mmu, Kuyie nkpɑ̀ɑ̀tìyuu diì tũ ntùɔ̀kɛní di cuokɛ̀.

²¹Onitikperì bɑ̀ɑ́tí dìì mɔ̀nnì mɛsɑ̀ɑ̀ nkɛ bɑɑ o cĩ́ɛ̃̀tɛ̀ o kpɛrɛ dɛmɔu ɔ̃ mbomu bɛ́u.

²²Kòo nìtì mɔù mɛ nkɔ̀tɛní wèè kpeńnì koò pɛ̃ɛ̃tɛ́, koò nɑ, ò bo fietɛ o kpɑ̀rìnɛntì ò do tɑ̃́ tì, kɛ́túótɛ́nɛ̀ o kpɛrɛ kɛ́totí.

²³Wèè í n wɛ̃ńnɛ̀ ò n kpɑ̀nnɛ̀mu, wèè í n wɛ̃ńnɛ̀ kɛ̀ ti tíkíí ò dɛ́ímu.

²⁴Kɛ̀ dibɔɔ̀ yɛ̀ onìtì kɛ kɔ̀tɛ tɛdɔntɛ̀ ĩ́nkɛ̀, kɛ wɑnti dì bo om̀pɛ̀ dɛ̀, kɛ mɔ̀ńtɛ́ dì bo yĩ́: M bo wɛ̃tɛ n sòò bo wèè miɛkɛ.

²⁵Dì tùɔ̀koo dìì mɔ̀nnì kɛ́nsɔ̃́ ndɛ̀ kɑ̀útɛ́ pɑ́íí kɛ tũ̀ntɛ bɑ́ òmɔù í bo o miɛkɛ.

²⁶Kɛ̀ dìi wɛ̃tɛ kɛ́wɑɑnní yɛtɛyɛ̀ yɛ̀yiekɛ̀ yɛ̀ɛ̀ dɔ̀kɛ yóù kɛ dì pɛ̃ɛ̃tɛ́, kɛ̀ yɛ̀ɛ wɛ̃tɛ kɛ́tɑ o miɛkɛ, kòo borimɛɛ sĩntɛ kɛ́pɛ̃ɛ̃tɛ́ mɛ̀ sòò dòmmɛ̀.

²⁷Yesu kpɑɑ́ kɛ mɛ nnɑ́ɑ́ nkòo nitipòkù mɔùu bɛ́inní ditĩ̀nnì miɛkɛ kɛ dɔ̀: Dɛ̀ nnɑɑti onitipòkù wèè dɑ pɛitɛ́, ɑ yɑ̃ɑ̃́ wè.

²⁸Kɛ̀ Yesu ò tɛ̃̀ńnɛ́ kɛ dɔ̀: Dɛ̀ pètìnkɛ ńnɑɑti bɛ̀ɛ̀ kèḿmú bɛ̀mbɛ Kuyie nnɑ́ɑǹtì kɛ dɔɔri tì yɛ̃mmɛ̀.

²⁹Kɛ̀ bɛnìtìbɛ̀ ntikuní Yesu borɛ̀ kòo bɛ́i nkɛ dɔ̀: Di mmɔ̀nnì kó bɛnìtìbɛ̀ bɛ̀ɛ̀ bùtínnɛ́ Kuyie nkɛ dɔɔri mɛyɛi, mbɛ̀ tú n dɔɔ̀ tidiɛtì bɛ̀ mɛ mbɑ́ɑ́ tì yɑ̀ kɛ̀ dɛ̀ í tú tìì do dɔ̀ɔ̀ Sonɑɑsi.

³⁰Sonɑɑsi do túmɛ̀ dibɛnkɛ̀rì Ninifu kɔbɛ kpɛ́í, mmɛɛ̀ botí nku Onìtìbirɛ yó ntúmɛ̀ dibɛnkɛ̀rì di mmɔ̀nnì kó bɛnìtìbɛ̀ kpɛ́í.

³¹Tibeéntì kó diyiè Sebɑɑ kóo nitipokpɑ̀ɑ̀tì bo cómmú kɛ́bekɛ́nɛ̀ di mmɔ̀nnì kɔbɛ kɛ́ bɛ̀ kpetínnɛ́ kɛ yɛ̃́ ò ìtɛ́nímɛ̀ dɛdɛ́tirɛ̀ kɛ kɔ̀tɛní kɛ kèè Sɑdomɔɔ nɑ́ɑǹtì mɛciì nkpɛti. Nɛ́ ntɛnɛ̀ òmɔù diɛ nkɛ dɛunɛ̀ Sɑdomɔɔ.

³²Tibeéntì yiè Ninifu kɔbɛ bo cómmú kɛ́bekɛ́nɛ̀ di mmɔ̀nnì kɔbɛ kɛ́ bɛ̀ kpetínnɛ́ kɛ yɛ̃́ Sonɑɑsi do bɛ̀ nɑ̀kɛ́mɛ̀ kɛ̀ bɛ̀ɛ ceetɛmu. Nɛ́ ntɛnɛ̀ òmɔù diɛ nkɛ pɛ̃ɛ̃tɛ́ Sonɑɑsi.

³³Kɛ̀ Yesu bɛ́i nkɛ dɔ̀: Bɛ̀ ɔ̃ɔ̃ í ncɔ́u nfìtírɛ̀ kɛ́ dɛ̀ ɑ̃nnɛ́ tɛcètɛ̀ miɛkɛ, bɛ̀ ɔ̃ɔ̃ dɛ̀ cɔ̃nnɛ́ dɛyiitírɛ̀ ndɛ, bɛ̀ɛ̀ kó dimɑ̀ɑ̀ tɑɑ̀ní kɛ̀ bɛ̀ nwúó nkuwenniku.

³⁴Inuɔ ntu tikɔ̃̀ntì kó dɛfìtírɛ̀ ndɛ, kɑ̀ɑ nuɔ nwúó nhɑ kɔ̃̀ntì timɔu ɔ̃ mbo kuwenniku miɛkɛ nkɛ. Kɑ̀ɑ nuɔ mmɛ nyí wúó ɑ kɔ̃̀ntì timɔu ɔ̃ mbo dibiìnnì miɛkɛ nkɛ.

³⁵Dɑɑtɛ kɛ̀ kuwenniku kùù bo ɑ miɛkɛ kɛ̀ kù bɑ́ ntú dibiìnnì.

³⁶Kɛ̀ kuwenniku dɑ mí ɑ kɔ̃̀ntì timɔu kɛ í sokɛ́ kupíkù mɑkù, ɑ kɔ̃̀ntì timɔu bo mbo kuwenniku miɛkɛ, kɛ́ndònnɛ̀ dɛfìtírɛ̀ ɔ̃ ndɑ mímɛ̀.

³⁷Yesu nɑ̀kɛ́ dìì mɔ̀nnì kɛ́deè, kɛ̀ Fɑdisĩɛ̃ mɔùu ò yu o cĩ́ɛ̃̀tɛ̀ mudiì, kɛ̀ Yesu kɔtɛ kɛ̀ bɛ̀ nyo.

³⁸Kɛ̀ Fɑdisĩɛ̃ mɔuu yɑ̀ Yesu yommɛ̀ bɑ́ ò í nìtɛ ikuɔ́ yɛ̃mmɛ̀ kɛ̀ dɛ̀ɛ ò di.

³⁹Kɛ̀ Yesu ò nɑ̀kɛ́ kɛ dɔ̀: Díndi Fɑdisĩɛ̃bɛ di ɔ̃ɔ̃ ɛitɛ́ fɛbòòfɛ̀ nɛ̀ dibuu ĩ́nkɛ̀ nkɛ kɛ̀ di miɛkɛ nɛ́ píɛ́kɛ́ oyúókù kó mɛyɛ̀mmɛ̀ nɛ̀ kuyonku.

⁴⁰Tiyɛìntì díndi! Kuyie nkùù dɔ̀ɔ̀ dɛ ĩ́nkɛ̀ kuù í dɔ̀ɔ̀ dɛ miɛkɑɑ̀?

⁴¹Mpɑ̃ɑ̃nnɛ̀ bɛcĩ̀rìbɛ̀ nɛ̀ di yɛ̀mmɛ̀ mɛmɔu, mɛmmɛ dɛmɔu dɛ̀ bo wenkɛmɛ̀ di kpɛ́í.

⁴²Di bo yɑ̀ díndi Fɑdisĩɛ̃bɛ! Díndi bɛ̀ɛ̀ duɔ̀ nKuyie ndi kpɛrɛ dɛmɔu kó mɛyɑɑtimɛ̀ tɛpíítɛ̀ nɛ̀ tikũnfɑ̃ɑ̃̀tòo, kɛ yóu di bo ndɔɔrimɛ̀ Kuyie ndɔ́ dɛ̀ nɛ̀ di bo nkù dɔ́mɛ̀. Di do dò nkɛ́ ndɛ ndɔɔri, di nɛ́ bɑ́ɑ́ yóu dɛsɔnnɛ.

⁴³Di bo yɑ̀ díndi Fɑdisĩɛ̃bɛ bɛ̀ɛ̀ nɔnnɛ̀ yɛkɑ̀rɛ̀ kètiyɛ̀ titííntouti miɛkɛ, kɛ dɔ́ bɛ̀ ndi dɔú nyɛkɑ̃̀ɑ̃̀tɛ̀ miɛkɛ kɛ ninkoo.

⁴⁴Di bo yɑ̀ díndi bɛ̀ɛ̀ dònnɛ ifɔ̃ti ìì dɑnnɛ́, bɛ̀ ɔ̃ ncentì ìì ĩ́nkɛ̀ kɛ í yɛ̃́.

⁴⁵Kɛ̀ Fɑdisĩɛ̃bɛ kóo kótì mɔùu bɛ́i nkɛ dɔ̀: Okótì ɑ nɑ́ɑ́ mmiɛ nkɛ sɑ̃́ɑ̃́ ntí mbɛ.

⁴⁶Kɛ̀ Yesu ò tɛ̃̀ńnɛ́ kɛ dɔ̀: Di múnkɛ bo yɑ̀ díndi Fɑdisĩɛ̃bɛ kó bɛkótíbɛ̀ bɛ̀ɛ̀ bou yɛtuɔ cɛ̃́ɛ̃́yɛ̀ kɛ tounko bɛnìtìbɛ̀, di mɛ nyí bɛ̀ teénnɛ̀ bɑ́ sɑ́m̀pɔ́ mutɔù.

⁴⁷Di bo yɑ̀ díndi bɛ̀ɛ̀ mɑɑ̀ mɛsɑ̀ɑ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ di yɛmbɛ̀ do kuɔ̀ bɛ̀ kó ifɔ̃ti.

⁴⁸Nɛ̀ dɛ miɛkɛ di bɛnkúmu di kómmúmɛ̀ di yɛmbɛ̀ kɛ yɛ̃́ bɛɛ̀ kuɔ̀mɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ kɛ̀ díndi mɑɑ̀ bɛ fɔ̃ti.

⁴⁹Dɛɛ̀ kpɛ́í nte Kuyie nnɛ̀ ku kó mɛciì mmiɛkɛ kɛ̀ kùu bɛ́i nkɛ dɔ̀: M bo bɛ̀ duɔ́nko m pɑ̃ɑ̃nɑ́ɑǹtì nɑ́ɑm̀bɛ̀ nɛ̀ n tɔ̃rɛ̀, kɛ̀ bɛ̀ɛ kuɔ biɛ nkɛ́fɛ̃́ũ mbɛtɔbɛ̀.

⁵⁰Kɛ̀ dɛ̀ɛ yie nkɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛ̀ do kùɔ bɛ̀ nɛ̀ kutenkù ketɛ́mɛ̀ kɛ̀ bɛ kó tibeéntìi do di mmɔ̀nnì kɔbɛ yɔ ĩ́nkɛ̀,

⁵¹kɛ́ketɛ́ Abɛɛri kó mukɔ̀ù, kɛ́ntɔ kɛ́tuɔkɛnní Sɑkɑrii bɛ̀ kùɔ wè Kuyie ncĩ́ɛ̃̀tɛ̀ nɛ̀ diwũɔ̃tɔ̀nnì dɛ sɑku. Mɔ́mmuɔ nwe n di nɑ́ɑ́mmɛ̀ dɛ kó tibeéntì bo do di mmɔ̀nnì kɔbɛ yɔ ĩ́nkɛ̀.

⁵²Di bo yɑ̀ díndi ikuɔ́ nìùtì bɛ̀ɛ̀ pɑ̀ɑnko bɛtɔbɛ̀ Kuyie nkó kucɛ, di í kù tũ ndi mɔ́mmɔmbɛ, kɛ nɛ́ díítí bɛ̀ɛ̀ dɔ́ kɛ́ kù tũ̀nnɛ.