Diyon 20:15-19

¹⁵Yaka Yeisu i nel elana i ba, “Yova, hauna kaiwena ge u kahikahin? Henala u loloyaan?” Meli i nuwatu tage eba iya toeyowa, yaka i baek elana i ba, “Tonowak, ebo no Babala tuwana u kalivai egonan, he no wasa u pem ga u teliya, inoke na nok na na na ahe.”

¹⁶Yeisu i baek elana i ba, “Meli!” Yaka Meli i milil pil, ge i pana Hibilu i ba, “Laboni!” (Baaba ya ana sapu heiya “topankite.”)

¹⁷Yeisu i baek elana i ba, “Bahi nu pipihikagau ge nu kukuhikagau! Kaiwena nigeya ga ya sisikal ya haha Nam elana. Yaa u nok u na taliwau elal ge wali wasa nu pek te, ‘Ya sisikal ya nana Nam ge komiu Tamamiu elana, no Yabowaine ge wami Yabowaine elana.’”

¹⁸Inoke Meli Magidala yovana i nok i na i baek tohago elal i ba, “Babala iyaka ya kite.” Ge baaba toto Yeisu i baunan elana i wasaan elal.

¹⁹Lan toto o, iya wik ana lan houwan, sabwelu iyaka i lobek ge bulin i gan, he tohago heliya iyoho hi mipamaisena limi etega elana, ge ana nog hi loka kaus, kaiwena Yudiya wali tologugui hi lovakunagil. Inoke Yeisu i na i tuk i talmilil gamwaliyaa, yaka i ba, “Atemiu ni laumwal!”