Dioni 2:7-20

⁷Yesuma꞉ mo e pokaemeke haliweki pa꞉ta꞉ alota꞉ Mo toopi ikali kanake manuna꞉ ikalima꞉ tumba tumba pipe leekeme. Koto leeke mo haliwekima꞉ mo ipi kanakemanu tumba tumba pimikime.

⁸Kutu pu paeyeke Yesuma꞉ alota꞉ Mandane ekita꞉ kanake mandane ekina꞉ yupu tia mo ne handeteke hala꞉ hali pa꞉ta꞉ mea pua hala꞉pe leekeme. Koto leeke mo ikali mandaneeki yupa mea pua halemekeme.

⁹Kutupa mo halima꞉ mea naa handeekepate ota꞉ waini ikalima꞉ kone handeekeme. Mo halima꞉ta꞉ koto waini ikali yupimikieki pa꞉ta꞉ hone na wiekepate hande ikali yupimiki e pokaemeke haliwekima꞉ hone wimikime. Koto ekina꞉ ipikana꞉ma꞉ mo wanda꞉ tekehali wi la꞉ mea

¹⁰ipiki pa꞉ta꞉ alota꞉ Haliweki paeyaoma꞉ waini ikali ota꞉ epekeeki amba꞉la hale hale pea kutupa mo ne nolo epo laa epemeke wanda꞉halima꞉ waini ikali wopu nemeke hoki naneta꞉ mo hosiki metoko piki waini ikali hale hale pilieke. Pate nakana꞉ma꞉ mo ota꞉ epeke waini ikalita꞉ hosiki sa꞉sa꞉ pea wia hao ame kone hale hale pina꞉ aleme leekeme.

¹¹Yesuma꞉ta꞉ mo Ka꞉lili nane hayeke da Keina da pa꞉ta꞉ hata꞉ ipika꞉ wele piekeeki koto pa꞉ta꞉ amba꞉la piekeme. Koto pa꞉ta꞉ hata꞉ ipikana꞉ma꞉ ipika꞉ kapu tieke hala꞉eki peneme yao waleeke handaa ipika꞉ disaipolo haliwekima꞉ ipiki pa꞉ta꞉ hone tulaemekeme.

¹²Kutu pieke hoki naneta꞉ Yesu make ipika꞉ inkiki make ipika꞉ hameketiti make ipika꞉ disaipolo haliweki tonka꞉na꞉ paeyao Kapeneami da pa꞉ta꞉ pua hoto mandane ekimanu koto pa꞉ta꞉ haemekeme.

¹³Mo Diu wanda꞉halima꞉ ika꞉ Lombei Pupa Yapeeke natena꞉ ne pambuluekema꞉ haemeke handaata꞉ Yesuta꞉ mo Diutuseleme da nane peekeme.

¹⁴Yesuma꞉ mo tembolo da tukiki pa꞉ta꞉ pua handeekepate mandane haliwekima꞉ kao make sipisipi ma꞉na꞉manu make melipuma꞉ handeke bamanu make mandane haliwekima꞉ hambena꞉yeke wia pitimikieki make mandane haliwekima꞉ ika꞉ teipolo pa꞉ta꞉ pita꞉ mani topo pimikieki make handeekeme.

¹⁵Ipikana꞉ma꞉ pu tunkulikimanu meaata꞉ ponka꞉ pilimepi pea depita wepiaata꞉ paeyao hama pena꞉ mo kao sipisipi ma꞉na꞉manu tonka꞉na꞉ tolu liekeme. Mo mani topo pu pitimiki haliwekina꞉ teipolomanu londolo ba ba pea ika꞉ manimanu tonka꞉na꞉ hoelo ba ba piekeme.

¹⁶Kutupa mo melipuma꞉ handeke bamanu wia pitimiki haliweki pa꞉ta꞉ alota꞉ Do alemanu mu tia hama pupe. Yaka Apa꞉na꞉ data꞉ makedi da au na lapa꞉peke leekeme.

¹⁷Ipika꞉ disaipolo haliwekima꞉ mo Baibolo bukana꞉ wape pa꞉la꞉eki hone wimikime dupae. Koda꞉o. Naka꞉ da epeaalo polo hone witolo ekita꞉ I̱ta꞉ titipu wopu polome wape pa꞉la꞉me.

¹⁸Mo Diu haliwekima꞉ ipika꞉ pi hombo peaaluekema꞉ lota꞉ pitolo alota꞉ Do pitele hauta꞉ naka꞉ biki ula꞉eki niki pa꞉ta꞉ta꞉ waluekema꞉ eki wele piteleeki pilipiki lemekeme.

¹⁹Yesuma꞉ ika꞉ pi hombo peaaso alota꞉ Do hande Koda꞉na꞉ da leisimika꞉na꞉ta꞉ I̱ma꞉ hoto tepona꞉ pa mea a꞉meiyao haena꞉ lolueke leekeme.

²⁰Mo haliwekima꞉ alota꞉ Do hande tembolo da a꞉etolo haena꞉ 46 bapimanu amba꞉ paeya꞉pate nakana꞉ma꞉ta꞉ hoto tepona꞉ kone paa mea a꞉meiyao haena꞉ loluekema꞉ alepe lemekeme.