Dioni 20:1-19

¹Da kelepuluekema꞉ yu pa̱a̱ pitolo haena꞉ Sande kone Ma꞉kadala wanda꞉ Metita꞉ hande hali hoimiki pa꞉ta꞉ puaata꞉ hande naku kake a꞉mbaniao wimiki toopita꞉ paa londolo wiekeeki handeekeme.

²Kutupa handa anke hao pua Saimono Pida pa꞉ta꞉ make hande Yesuma꞉ pukima꞉ homeeke disaipolo hali ma꞉nda꞉ pa꞉ta꞉ make ipiliki yaapo pa꞉ta꞉ ipikana꞉ma꞉ pua alota꞉ Mo hande naku pa꞉ta꞉ Tekehali toko yoka wilimieki make na handoloma꞉ma꞉ hando pa꞉ta꞉ wia pelemepe leekeme.

³Koto ekina꞉ Pidata꞉ hande disaipolo hali yaapota꞉ mina꞉pa꞉lao mo hali hoimiki pa꞉ta꞉ pepekeme.

⁴Anke homeke halupa pepekepate hande disaipolo halita꞉ Pida wetepeao ipiki amba꞉la mo hali hoimiki pa꞉ta꞉ opolo peekeme.

⁵Kutupa ipikita꞉ pua panda꞉puniao hande hali tonkao hoimiki daumanu wiekeeki handeekepate na honda꞉ pambolo peekeme.

⁶Saimono Pidata꞉ wetepena꞉ opolo a꞉pa kutaa kone lombei pua mo naku pa꞉ta꞉ honda꞉ pamba peekeme. Ipikana꞉ma꞉ta꞉ hande hali tonkao hoimiki daumanu make

⁷Yesuna꞉ you tonkaemeke dau make handeekeme. Koto dauta꞉ hande hali tonkao hoimiki daumanu apa꞉tao na wiki pa tonkaake tonka꞉na꞉ pa ipika꞉ ta꞉ta꞉ ma꞉nda꞉ pa꞉ta꞉ wiekeme.

⁸Pidama꞉ kutu pitolo haena꞉ta꞉ hande hali hoimiki pa꞉ta꞉ titina꞉ amba꞉la peeke disaipolo hali make wetepena꞉ honda꞉ pamba pua mo piekeeki handaata꞉ ota꞉ hone tulaeyekeme.

⁹Koto pita꞉ta꞉ mo hali yaapoma꞉ta꞉ mo Baibolo buka pa꞉ta꞉ Yesuta꞉ homaa paa tiaalo pa꞉la꞉eki wape pieke ekita꞉ hone a̱i̱ na wipikime.

¹⁰Kutupata꞉ mo disaipolo hali yaapota꞉ paa la꞉ka꞉la da nane pepekeme.

¹¹Metima꞉ta꞉ hande hali hoimiki pa꞉ta꞉ hama꞉ nane e̱ lo hayekeme. E̱ alo alo hata꞉ ipikana꞉ma꞉ panda꞉puniao mo hali hoimiki pa꞉ta꞉ wako puniaeyekepate

¹²koto pa꞉ta꞉ enisolo yaapo handeekeme. Mo hali yaapota꞉ hakepiki dau pamba alu pea Yesu toko amba꞉ wimiki alena꞉ ma꞉nda꞉ta꞉ you nane pitu ma꞉nda꞉ta꞉ anke nane pitu pea pitipikime.

¹³Ipilikana꞉ma꞉ Meti pa꞉ta꞉ alota꞉ Wanda꞉o. Ekipeke e̱ alepe lepekeme. Ipikana꞉ma꞉ ipiliki pa꞉ta꞉ alota꞉ Ikana꞉ma꞉ yaka Tekehali mea pua wilimi pa꞉ta꞉ make I̱ na handolome leekeme.

¹⁴Kotoeki laa la꞉ka꞉la koto pa꞉ta꞉ Yesu hayekeeki handeekepate kone Yesue hone na wiekeme.

¹⁵Yesuma꞉ ipiki pa꞉ta꞉ alota꞉ Wanda꞉o. Ekipeke e̱ alepe. Epi weitolo alepe leekeme. Mo wanda꞉na꞉ hone wieke ekita꞉ mo e handeteke hayeke hali patema꞉ ipiki pa꞉ta꞉ alota꞉ Aneke halio. Nakana꞉ma꞉ ipiki mea pua wika꞉na꞉ta꞉ kota꞉ koto wili alena꞉ I̱ pa꞉ta꞉ la kie. Kutu pika꞉na꞉ta꞉ I̱ma꞉ mulu polueke leekeme.

¹⁶Yesuma꞉ ipiki pa꞉ta꞉ alota꞉ Metio leekeme. Mo wanda꞉ma꞉ ipiki pa꞉ta꞉ la꞉ka꞉la mina hata꞉ Hibulu pi la alota꞉ Labonaie leekeme. Koto leeke ekita꞉ Wala꞉la꞉ Halio laa leekeme.

¹⁷Yesuma꞉ ipiki pa꞉ta꞉ alota꞉ I̱ na mina꞉pe. Yaka Apa꞉ pa꞉ta꞉ a̱i̱ na la꞉ka꞉la a꞉meilo ekina꞉ loa꞉me. Yaka kametiti pa꞉ta꞉ yaka pi lawaalo pua꞉peke. Yaka Apa꞉ ika꞉ Apa꞉ make yaka Koda꞉ ika꞉ Koda꞉ make ipiki pa꞉ta꞉ paa la꞉ka꞉la a꞉meinolome lapeke leekeme.

¹⁸Koto ekina꞉ Meti Ma꞉kadala wanda꞉ mo disaipolo haliweki pa꞉ta꞉ opolo pua Tekehali handeekeeki make Tekehalima꞉ ipiki pa꞉ta꞉ leeke pimanu make la haleekeme.

¹⁹Koto Sande timbaata꞉ mo hande disaipolo ame̱le̱ pomu haemeke haliwekima꞉ mo Diu haliweki pa꞉ta꞉ paala꞉ma꞉ homolo hata꞉ da pota꞉manu poka loka꞉ hao da tukiki pa꞉ta꞉ momba꞉la pitimikipate Yesuma꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopa꞉niaape leekeme.