Dion 7:34-49

³⁴E yona tai, go e ya tananegai. Ne amba wanigepena e ya tauai.”

³⁵Diu nagirewa muk gare gare anega wane, “Apan ma anut mega gapan amba aepi nu me ya tanat waiwan? Me wandap Diu nagirewa ian Gurik at muga arige gapan wanumuinewa mu inamup ae wadidiamopen menan waiwan go?

³⁶Me manega waini tavewa dim da? ‘E yona tai, go e ya tananegai. Ne amba angepena e ya tauai?’”

³⁷Barip ame wam verisiwa gapan, Iesu ao yon wande amba nop kaimakaet anega wan, “Da da megewa pakaraepiwa, me inanap one amba kaum nap.

³⁸God nop mega namua ok anega seane, Me da da ne anu tumat nimanegepiwa, me gamup inak yaibobot, kaume urewa bobot wa taue aiwandata.”

³⁹Iesu inak yaibobot kaumewa maibe mini wani, tavewa ame Guewa Woup Seniwa menan wan. Da da anu tumasepiwa Guewa Woup Seniwa evi da mu warain. Iwa Iesu wam ame gapan kiman ya dot aen, go evi amba Iesu kimani aepi Guewa Woup Seniwa watu en muneta.

⁴⁰Nop mega anuiwanumune waenapan upi anega wane, “Tave di apan ma Keriso tauapen menan God noa waini apanewa.”

⁴¹Upi anega wane, “Me God wa watu eneni mega Keriso di.” Go upi gare wane, “Uon, iwa Keriso at Galili gapan ya taueta.

⁴²God oise kakaewa namua seane ame, Keriso, me Devit naewa, at Betiriem gapan taueta, (at Betiriem ame apanewa Devit iniwandini arewa).”

⁴³Menan waenapan seu enun iwa Iesu gagap wane.

⁴⁴Upi warapen anun, go da ya to warane.

⁴⁵Menan God Paewa amase taine nagirewa ewagai amon pirisi bawarewa amba Parisi nagirewa mu singui wayawamon, “Iwa dimen Iesu ya wat onayan?”

⁴⁶Amase taine nagirewa aroga gare wan, “Apan daiton da nop manega ya waiwandini ame Iesu me waiwan.”

⁴⁷Parisi nagirewa gare kaimakaet diamon, “E waiana Iesu e den pusiap warupen go?

⁴⁸Diu namu yo yo nagirewa, iup namua anut warine nagirewa, ge nu Parisi nagirewa da Iesu ya anu tumat taton.

⁴⁹Uon! Go orup mondigawa, iup ya anuine nagirewa, mugenat Iesu anu tumat tane. Ai! God nemoro mega inamup wandep.”