Dion 6:39-71

³⁹Endi God watu enanegeni apanewa anut mega mam, me neneni waenapan da daiton mini ya wakaumapen go wam verisiwa tauepi ne tapena inak muse iravi ao yon wanumoin.

⁴⁰Ne Mamana anuini ame waenapan ne yawanege anu tumat nimanegepi mu yaibobot inagewa tautanain. Amba wam verisiwa ne tapen inak muse ao yon wanumoin.”

⁴¹Nop ma wani, iam Diu nagirewa gwen gurut wan notatae wane, iwa me anega wani menan, “Ne Kimani Vitana tabaewa.”

⁴²Menan mu anega wane, “Ma Iesu apan Diosep otua ine mame nu asiginup iwa dimen me anega waiwandini ne Kimani Vitana tabaewa?”

⁴³Iesu anuni me gare anega wan, “Gare gare gwen gurut ek waiana ae vean,

⁴⁴Orup da da mu aro muga gapan inanap ya onamoin go Mamana watu enanegeni wa upamopi inanap tauain. Amba ame wam uiwa gapan, ne tapen inak muse ao yon wanumoin.

⁴⁵Wataget God nop oit mega waiwanumune nagire ok anega seane, God mek waenapan wadidiamuiwandata. Nop ame tavewa waenapan da da darine pemak Mamana nop wapi anupiwa amba me inap yao asik tapiwa ame nenan onamoin.

⁴⁶Waenapan da Mamana ya yawane, ame God den wandini otua megenat Mamana yaven.

⁴⁷Ne tavewa di wadiaivin, orup da anu tumat taiwandapinawa yaibobot inagewa wareta.

⁴⁸Ne inak tabaewa.

⁴⁹E isimurae wai wataget at kaimewa gapan taba mana nane go mu borit wane.

⁵⁰Go taba endi mame kimani vit oneni ame ugup, orup da napiwa me ya boeta.

⁵¹Ne yaibobot tabaewa Kimani Vitanawa, orup da taba mame napiwa yaibobot wande aiwandata. Taba mame ne etunawa ame ne iragi piup ma munan inak gamup wariwanumain.” Iesu ap anega wan.

⁵²Iesu nop mame waiwandin anune menan, ian Diu nagirewa ugu gangane den nop kaimakaet gare gare anega wane, “Apan ma nive mone anenen nunep nata waiwan?”

⁵³Iesu anega sia diamon, “Ne tavewa di wadiaivin, e kimani viseni apanewa etua ge deniwa ya nanewa, kiman inak megawa da potayap uon.

⁵⁴Orup da da ne etuna ge denina napiwa mu yaibobot inagewa gapan wanumoin. Amba wam uiwa gapan ne tapen mu inak muse ao yon wanumoin.

⁵⁵Ap menan, ne etunawa ame inak tabae iragenawa amba deninawa inak kaume iragenawa.

⁵⁶Orup da da etuna ge denina napiwa ame mu ne potanap wanumoin amba ne mu potamup wanik angingain.

⁵⁷Ne Mamana yaibobot wandiniwa watu enanegen menan ne wanik angin iwa Mamana gamup, ap umap sia orup da ne gamunap inak tabaewa naiwandapinawa me wande aiwandata iwa ne gamunap.

⁵⁸E isimurae omae bae taba mana nane borit wane, go taba buredi mame kimani viseniwa menan orup da taba mame na iniwandapinawa me yaibobot wande aiwandata.”

⁵⁹Iesu nop mame waiwandini ame iam iam paewa at Kaponiam gapan wadidiamuiwandin.

⁶⁰Nop mame anune Iesu wadiamot mega anega wane, “Ma anenen opata ma kaimake den, da anu wareta?”

⁶¹Iesu mawap wane go Iesu imua gapan anuni, wadiamot mega aigap doran waiwanumune menan me anega wan, “Nop mam kaimake den waingina menan endao imaewan?

⁶²Endi ne namu kimani waingena arewa sia angepen yawanege e anenen anui!

⁶³Mame Guewa Woup Seniwa yonen inak muniwan, go nu etunua inak da ya muniniwa. Ne inak nopewa wadiaena ame God Guewa aroewa gapan tavewa arogameta, amba nop ame inak muniniwa.

⁶⁴Endi ne waingina e upi anu tumat ya taisi.” Iesu ame wani iwa ere mangan iragen Iesu me asigip tan orup ansena ya anu tumasiniwa amba orup ambe da omine wata.

⁶⁵Iesu sia anega wan, “Ap menan ne namu wadiaena orup da mek aro mega gapan inanap ya oneta go Mamana imu pose entan tapi gapan amba oneta.”

⁶⁶Wam mame use aeni gapan wadiamot mega upi tandayasen ae vean, amba ewap da sia ya amon.

⁶⁷Iesu apan aonagaet pusinawan derewa anega wayawamon, “Endi e den ae venek aiset anuiwanin go?”

⁶⁸Amba Saimon Pita garewa wadien, “Ayop, nu aneta da menan anait? Ge nop gegawa megenat yaibobot inagewa.

⁶⁹Nu anuton anu tumat taivin ge God watu eneni potaga woup seni apanewa daiton iragenawa.”

⁷⁰Iesu entan gare wan, “E aonagaet pusinawan derewa nagirewa om ne enuyen. Go e yaumakayap orup daiton megenat koerage.”

⁷¹Iesu ame wani Diuda apan Saimon Iskeriot otua menan wan. Me apan aonagaet pusinawan derewa ame da go evi me Iesu ominewa wata.