Dion 5:23-45

²³Ap menan waenapan iragi i omani seane Mamana viriwa taine mini ap anega ne inanap tain. Menan ne otua Iesu waenapan viripana ya tapi Mamana, ne watu enanegeni, viriwa mu den ya tain, iwa Mamana watu enanegeni menan.

²⁴Nop tavewa di wadiaivin, da da nona anu amba wa watu enanegeni apanewa God anu tumasepiwa inak yaibobot wariwandata. Orup ame God ya wanene tata go bop arewa gapan am ninigame inak arewa dotou aen.

²⁵Ne tave di wadiaivin, wam usira wandeni onin en ma gaset tauen bop nagire God otua nona anuin amba mu da da anupiwa inak warain.

²⁶Mamana me mek inak urewa di menan, me otua, ne, inak urewa nenen.

²⁷Amba ne wanene tapen aroewa neneni iwa ne Kimani Vitana apanewa.

²⁸Ap menan seke ya tane, wam oniwan borit wane nagirewa nona anu

²⁹ao yon wanumoin, mu kakae tane nagirewa mu ao yone inak warain, go mu koewa tane nagirewa ao yone wanene tautanain.

³⁰Ne nek ingane dim da ya tain, go dim da Mamana wadianegeni ap gapan wanene tamuivin. Ne wanene nega tamana iragen iwa ne nek nenan ya taivin go Mamana imu pose warapen menan taivin.” Iesu ap anega wan.

³¹Iesu sia anega wan, “Ne nek ingane oit nega wapenawa, oit nega aroewa uon.

³²Go God oitana waiwan amba ne asiginap anenen me oit nega wainiwa ame tavewa di.

³³E Dion inap singui tayawapen menan waenapan watu enamoyan amba me oit nega tavewa di wadiaen.

³⁴Ne waenapan da oitana wapen menan yowa ya taivin go Dion ne oitana wadiaeni gapan e inak warapen menan nop mame wadiaivin.

³⁵Dion me dun mini yagire ganasewa muniwandin, ap gapan e wam koni otu da ganat mega atonu tayan.

³⁶Go ne inak nega gueguewa itaniwa aigap Dion mega mini uon. Nao nega iragena Mamana taitamet wa neneni, mame di taivin. Nao nega mame tavewa wadiaivin ame God wa watu eneni apanewa ne me di.

³⁷Amba Mamana watu enanegeni mek ingane gutut negawa waiwan. E Mamana nop waini da ya anuyan o irewa da ya yawayan,

³⁸o nop mega potayap dugup ya waren wandia, iwa e ya anu tumasiwanin me daiton da ne watu enanegeniwa.

³⁹God nop mega namua ok seane pot pot batnagiwanin iwa nop ame gwanap inak yaibobot warayana anuiwanin. Nop ame oitana waiwan.

⁴⁰Go e inanap tanda taiwanin inak wara wara menan onaet ya anuiwanin.

⁴¹Ne apan wa atonat mega ne ya warain,

⁴²go ne asik taena ame, God baigan mega potayap ya wandia.

⁴³Ne Mamana Kimaniwa yaua gapan tauan, go e ya waranegean, go ne asiginap orup ugupe da ambagan mek yaua gapan tauepi, e menawaet warai.

⁴⁴E gare gare wa atonat taiwanin go God wa atonat imaepen yowa ya taiwanin ap menan anenen amba anu tumat nimanegai?

⁴⁵Go Mamana namup e tandayat nimanegiana menan ne ya anu koeragam imain go Mosis, e anu daviana apanewa, me anu koeragam imaeta.